TEGAL – Badan Narkotika Nasional Provinsi (BNNP) Jawa Tengah bareng karo BNN Kota Tegal nggagalna adol tuku ganja sing bobote 9,9 kilo. Pelaku ditangkep daning Petugas dina Rebo (19/2/2020) winginane.
Barang bukti seakeh kuwe disita seka telung tersangka sing hurup ngarepe A (43), KD (46), karo WS (41) nang tempat sing beda. Pelaku sing esih ana keturunan Aceh diamana petugas gabungan nang dalan Dr. Citpomangunkusumo, Kaligangsa, Margadana, Kota Tegal, dina Rebo. Pas kuwe, pelaku nembe bae adol tuku ganja nang Terminal Bis Kota Tegal.
“Rebo (19/2/2020) sekitar jam tengah pitu esuk, petugas ngamana tersangka A alias I sing mesen karo tuku narkoba sing bobote 9.973 gram lagi njalakna motor nang Kaligangsa, Margadana, Kota Tegal,” jare Kepala BNNP Jawa Tengah Brigjen Pol. Beny Gunawan pas nggelar kasus nang BNN Kota Tegal, Senen (24/2/2020).
Seka hasil pengembangan, A sing umahe nang Brebes kiye konangan mesen bareng karo kancane KD. KD daning petugas atane diamana jam sangan esuk ning umaeh sedulure nang Desa Tembokluwung, Adiwerna, Kabupaten Tegal.
Adong seka keterangane tersangka A karo KD, ganja kuwe dipesen seka W wong Desa Banjarsari, Kecamatan Ajibarang, Kabupaten Banyumas. Daning A karo KD ganja kuwe kulake regan rong juta satengah sa kilone. Rencanane arep didol maning regan telung juta sa kilone. Lah kiye si W, ngaku tuku seka wong sing nang Aceh regan sajuta telungatus sa kilone.
Mbuka Klinik Herbal nang Tegal karo Brebes
Pelaku A karo KD, nang Tegal karo Brebes malah mbuka praktek klinik pengobatan alternatif herbal. “Lan mbokaten klinik kiye didadekna kedok nggo peredaran peteng narkoba kiye. Kiye kudu diwaspadani,” jare Beny Gunawan.
BNN malah njaluk pemrentah daerah, termasuk kepala daerah angger nemoni ana klinik pengobatan herbal nang wilayahe eben bisa dikonfirmasi. “Bisa ditakokna perijinane, prakteke, lan kompetensine apa bener-bener nglakoni praktik herbal kuwe nggo pengobatan lan liya-liyane,” omonge Beny.
Ujare Beny, ganja esih njagongi posisi pertama peredaran peteng narkoba nang Indonesia. “Lan ganja kiye esih ditekakna sing Aceh atane lolos nang Lampung lan di gawa maring Jawa,” jare Beny.
Saliyane njaluk maspadani klinik herbal ilegal dadi sarang peredaran peteng narkoba, Pemda uga dijaluk melu aktif ngawasi panggonan-panggonan wong umum sing dadi tempat tersangka nggo transaksi.
Saliyane ngamana 9,9 kilo ganja, petugas uga ngamana motor siji karo mobil siji. Telung tersangka kuwe dijerat Pasal 114 ayat (2) juncto Pasal 111 ayat (2) juncto Pasal 132 ayat (1) UU 35 taun 2009. Anceman maksimale yakuwe ukuman mati utawa saumur urip.
Sakiye, petugas BNN esih nggoleti pelaku siji maning, sing wis dingerteni identitase. Pelaku sing sijine yakuwe anu pemasok nang Aceh sing magane si W kuwe olih barang kuwe. Sementara maring petugas, kelorone ngaku wis nglakoni transaksi ping pindo. (*)
Sing Nyunting: Irsyam Faiz
Discussion about this post