ATI-ATI duwé Group WA, aja nganti “Group Yahéérrr” bubar! Ngko ilang silaturahminé! Kuwé pesené Mas Jon sing diunggah nang “Group Yahéérrr” maring jakwir-jakwir sing mélu gabung nang kono.
“Bisané, Jon?” Kapér nanggapi unggahané Mas Jon.
Mas Jon ora mbalesi.
“Musti ana sebab-musababé bisané Group WA bubar.” Sidul nrémbol komentar.
Mas Jon tetep ora mbalesi.
“Yanu yakin bisané Group WA anggotané pada metu, jalaran guyonané mateng gén nyinggung perasaan!” Darto ilon-ilon nimpali.
Mas Jon tetep meneng ora beraksi.
Sawetara jakwir-jakwir liyané, uga ora kurang pada nrimbung. Ana pitung menitan, Mas Jon malah mbalang unggahan status anyar. Mung unggahan tulisané, ora kanggo mbalesi komentaré jakwir-jakwir, tapiné malahan ngunggah crita kutipan saka unggahan Group WA tetangga sebelah. Isiné kaya kiyé:
KISAH BUBARÉ GROUP WA
Awalé saka chattingan antaranggota lawas karo anggota sing témbé mlebu kanyaran.
Pak Firman : “Halo Sari, selamat gabung ning group kiyé ya?”
Sari : “Halo uga Pak Firman? Nyong anggota anyar nih. Njaluk bimbingané.”
Kang Sholéh: “Ya Sari, aja kuwatir sayang, nyong pan mbantu satemené kambén kowen.
Om Iwan : “Halo Sari, angger ana perlu apa-apa kari ngomong enyong baé. Tak bantu.”
Om Nuridin : “Halo Sari, nyong bisa mbatiri kowen maring endi paran. Kabari baé ya say?”
Om Adé : “Halo Sari.. kalem baé. Adong ana enyong, kabéhané bérés!”
Sari : “Suwun kanca-kanca. Sampéyan kabéh apik banget….”
Pak Ari : “Maaf, aran lengkapé kowen sapa?”
Sari : ”SARIFUDIN, asli Bulakpacing…..”
Pak Ari ndadak metu.
Om Iwan mélu metu.
Om Nuridin ilon-ilon metu.
Om Adé uga metu.
Pak Firman sing dadi Admin ya pada baé sekal metu. Kari Kang Sholéh sing mésih tetep online.
???????
Sari : “Kang Sholéh kok ora mélu metu???”
Kang Sholéh : “Ya! Nyong husnudzon lan sabar. Kabéhané musti ana hikmahé.”
Sari : “Iya Kang Sholéh, seluguné aran lengkapé enyong: INDAH PUTRI SARIFUDIN. Sarifudin aran bapané enyong. Nyong mantan Putri Indonesia Taun 2013. Nyong randa ditinggal mati sauwisé nikahan. Dadi nyong karo bojoné enyong durung sempet bulan madu. Muga-muga Kang Sholéh bisa dadi imamé enyong….”
Kang Sholéh : “Alhamdulillah… masa Allah…..”
Sari : “Aran lengkapé Kang Sholéh sapa, sih??”
Kang Sholéh : “SITI SOLÉHA….”
Sekal kuwé, Sari ndadak metu sing group…..!!!
Maca unggahan critané Mas Jon nang Group WA “Yahééérrr”, Kapér kepikel-pingkel. Sidul sing biasané prengat-prengut, ora kalah nyekakak. Sedengé Darto ngguyuné kosih banyu matané ndéwér. Wetengé kaku. Jebulé, Mas Jon bisa gluwéhan uga ya?! (@)
—–
Lanang Setiawan, penerima hadiah Sastra “Rancagé 2011” uga novelis.
Discussion about this post