BREBES — Brug Kali Pemali sisi lor nang Jalur Pantura Kota Brebes sempet ora bisa nggo liwat mobil, trek karo kendaraan gedhé liyané, dina Rebo tanggal 13 Januari 2021. Langkah kiyé dilakoni soalé banyu Kali Pemali mlubér nganti lével abang utawa waspada.
Pantauan PanturaPost, kondisi dhuwuré banyu kali pemali pancén nguwatiri. Mlubéré banyu nganti nrajang brug. Kondisi kuwé dikuwatirna pan ngaruhi kondisi konstruksi brug lan nrawasna.
Ditutupé brug Pemali sisi lor utawa arah Jakarta-Tegal kuwé dilakoni Jajaran Satlantas Polrés Brebes bareng karo Satker Pekerjaan Jalan Nasional (PJN) Wilayah 1 PPK 1.1 Provinsi Jawa Tengah. Brug molai ditutup sekitaréng jam tengah sewelas awan karo masang barikade nang dalan.
Arus kendaraan seka arah Jakarta dialihna nggunakna brug Pemali sisi kidul. Brug kuwé dienggo nggo rong arah arus kendaraan. Nggo motor, ésih diolihi lewat jalur kaya biasané.
Baca Juga
“Karo kondisi kaya kuwé, dhéwék nglakoni rékayasa lalu lintas karo nutup brug Pemali sisi lor, lan arus dialihna maring brug sisi kidul. Pengendara dijaluk sabar,” ungkapé KBO Satuan Lalu lintas (Satlantas) Polrés Brebes, Iptu Triyono.
Triyono ngungkapna, ditutupé kuwé pan diberlakukna ngantikan kondisi banyu Kali Pemali normal maning lan nganggo cara konstruksi ora nrawasna.
“Wayah diterapnané rékayasa kiyé bakal nggawé kendaraan antri dawa, mengko kendaraan pan dhéwék alihna maring tol metung lawang Brebes Barat utawa Brebes Timur,” pungkasé. (*)
Disunting Daning: Irsyam Faiz
Discussion about this post