BREBES — Nang Kabupatén Brebes, ana bayi diwéin aran sing unik nemen. Bayi sing lair nang tanggal 23 Désember 2020 kuwé diwéin aran Dinas Komunikasi Informatika Statistik.
Bocah kuwé yakuwé anak lanang seka pasangan Slamet Wahyudi (38) lan Ririn Linda Tunggal Sari (33), warga Dukuhturi, Kecamatan Bumiayu. Jaré bapané si bayi, aran unik kuwé diwékena merga dhéwéké wis nadzar kawit ganu.
“Sajegé taun 2003 wingi nyong molai nyambut gawé nang Dinas Kominfo Kabupatén Brebes dadi penyiar radio Top FM Paguyangan. Nganti pas taun 2009 wingi, nyong ditampa dadi PNS. Nah, nyong wis duwé nadzar pas kuwé, angger duwé bocah lanang nyong pan arani sesuai karo tempat ngabdi utawa nyambut gawéné nyong lawasé kiyé,” omongé Slamet Wahyudi, dina Rebo 7 April 2021.
Wong lanang sing akrab dundang Yoga kuwé nyebutna aranéng anaké sing unik sempet ditakokna daning pihak kluwarga gedhéné. Tapi, sawisé diwéin pemahaman akhiré nrima.
Baca Juga
“Bojoné nyong ndukung, tapi wong tuwané nyong sempet takon baé. Tapi akhiré pada ngarti lan belih mersoalna aranéng anaké nyong,” omongé Yoga sing saiki nyambut gawé dadi staf nang Dinas Komunikasi Informartika Statistik (Dinkominfotik) Brebes kuwé.
Yoga nyebut, saliyané nduwéni aran sing unik, putrané kuwé uga nduwéni undangan aran sing apik yakuwé, Dinko. Aran undangan kuwé, jaréné, dijukut nganggo dasar singkatan seka aran dawa anaké.
“Ngundangé Dinko, nyong wis mertimbangna luwih lanjut karo bojoné kekait aranéng anak keloroné nyong kiyé,” pungkasé. (*)
Discussion about this post