TAU krungu? Nang brug sing tinuju Gunung Tanjung, Kecamatan Lebaksiu, Kabupaten Tegal pernah ana kedadian nggilani? Ora setitik masyarakat ngendi paran kepédek-pédek uga kecemplung kali? Kedadéan kuwé gegara masyarakat pada sol-solan nang tengah-tengah brug. Sing wétan njubel wong-wong pan balik, dipapag moyéké uwong tinuju Gunung Tanjung. Akibat del-delan masyarakat, brug sing umuré wis tuwa ndadak repak. Bléh ampun maning, wong sekandang bentang kejebur maring dasar kali.
Crita nang nduwur kuwé dibabarna Jon Dapuk nalika jakwir-jakwiré ngumpul nang Pos Ronda. Krungu omongan kuwé, jakwir-jakwir Jon Dapuk merem-merem.
“Kuwé kedadéan taun piran Jon?” takoné Darto.
Kaya biasané Jon Dapuk emoh njawabi sadurungé jakwir-jakwiré pada mbabar pitakonan. Déwéké ngenténi jakwir liyané nyuara.
“Ader tau ana kedadian kuwé, Jon?” omongé Kapér.
“Saslentingan enyong pernah krungu tapi embuh, kuwé kedadian taun pira, Jon?” omongé Sidul karo endasé ndengak. Kaya-kaya lagi nginget-nginget kedadian sing gawé ngenes ning ati.
Kaya biasané, sadurungé Jon Dapuk njawabi pitakoné jakwir-jakwiré, déwéké nyruput téh poci latané nyuled sigarét. Kaya biasané Kapér ndudut rokok saeler dékéné Jon Dapuk sing kesanding nang adepané jakwir-jakwiré.
“Kedadian kuwé kira-kirané taun 1986. Waktu samana enyong awal-awal dadi wartawan nang Mingguan Swadesi, terbitan ibukota. Buku kliping sing muat berita kuwé, tak goléti ora ketemu. Tapi pristiwa kuwé akéh uwong sing dadi korban, kejebur maring kali!” omongé Jon Dapuk.
“Korbané ana pira, Jon?” dedes Darto.
“Saking suwéné pristiwa, enyong beléh kémutan.”
“Dilacak nang google laka, Jon?” takoné Kapér.
“Jaman samana durung ana internet. Média google ya durung lair. Dong nyong kirim brita, nganggoné faximil. Tapi brita kuwé jelas nyata.”
“Jaman samana, wong-wong gemredeg maring Gunung Tanjung ana apa sih?” takoné Sidul.
“Waktu samana pas dina Rebo Wekasan. Kebeneran baé ana péntas dangdut. Saka ngendi paran wong-wong pada teka. Tapi jalaran moyék akéhé masyarakat ngebeki brug, ketambahan umur brugé wis tuwa, akhiré rempak. Siji tut siji wong-wong pada kejebur maring kali gén akéh sing kepédek-pédek. Tapi embuh korbané pira, nyong klalén. Sebab kedadiané wis suwé nemen.”
“Kaya kuwé critané Jon?” takoné Darto.
“Yaul!” Jon Dapuk nutup critané. (*)
—
Lanang Setiawan, Seniman dan Penulis Novel.
Discussion about this post