BREBES — Badan Pusat Statistik (BPS) nyatet, nganggo dasar Sénsus Penduduk taun 2000 (SP2000), Kabupatén Brebes njagongi réngking pertama nggo jumlah penduduk nang Jawa Tengah. Kabupatén Brebes nduwéni jumlah penduduk seakéh 1,98 juta jiwa seka jumlah penduduk nang Jawa Tengah seakéh 36,52 juta jiwa lan penduduk Indonesia seakéh 270,2 juta jiwa.
Data kuwé nganggo dasar hasil rilis Badan Pusat Statistik (BPS) bareng karo Kementrian Dalam Negeri wayah ngrilis bareng Hasil Sénsus Penduduk taun 2020 lan Data Administrasi Kependudukan (Adminduk) taun 2020 nang Hall Room Hotel Borobudur, Jakarta, dina Kemis (21/1) wingi.
Rilis dikintili virtual daning Wakil Bupati Brebes Narjo bareng karo Sekda Brebes Djoko Gunawan, Kepala Dinas Komunikasi Informatika dan Statistik Tatag Koes Adiyanto, Kepala BPS Brebes Prita Rextian, Kepala Dinas Kependudukan dan Pencatatan Sipil Mayang Sri Herbimo, uga Kepala Dinpermades Subagya, seka ruang rapat Setda Brebes.
Rengking ke loro nggo Jateng, Cilacap seakéh 1,94 juta jiwa, ke telu banyumas 1,78 juta jiwa lan papat kota Semarang seakéh 1,65 juta jiwa.
Baca Juga
Jaréné Narjo, jumlah penduduk sing gedhé yakuwé tantangané dhéwék nggo Brebes. Bisa dadi berkah kalané penduduké duwé kualitas tapi dadi masalah wayah penduduké ora duwé kualitas. Nggo kuwé, perluné peningkatan Sumber Daya Manusia (Brebes) ébén penduduk Brebes selot duwé kualitas.
“Penduduk sing akéh dadi peluang sekalian tantangan nggo pembangunan Kabupatén Brebes,” omongé Narjo neng keterangan ketulisé.
Brebes, jaréné, bisa dadi sumber tenaga kerja sing luar biasa. Apamaning wayah ngadepi bonus démografi jelasé dadi saingan sing ora énténg nggo bocah bocah enom Brebes.
“Pemkab Brebes pan terus upaya semaksimal mungkin nggo ningkatna kualitas SDM uga kesediaané lapangan kerja. Antara liya dibanguné Kawasan Industri Brebes lan Kawasan Peruntukan Industri Brebes. Nyong optimis, Brebes selot hebat karo penduduk sing akéh,” ungkapé.
Neng rilisé, BPS nyebutna, hasil SP2020 seakéh 270,20 juta jiwa, sementara nganggo dasar Data Administrasi Kependudukan (Adminduk) sing dikumpulna daning Kementerian Dalam Negeri (Kemendagri) yakuwé 271,35 juta jiwa. Datané kuwé béda merga hasil Sénsus penduduk sing dilakoni BPS yakuwé data per wulan Séptember 2020. Sementara Data Adminduk sing diduwéni Kemendagri nggunakna data per wulan Désember 2020.
Kepala BPS Pusat Suhariyanto nerangna, nang lével Nasional jumlah penduduk hasil SP2020 wis pada karo data Adminduk sing ana nang Kemendagri. Bédané jumlah kuwé yakuwé gambaran akehé penduduk sing pada pindah, yakuwé nggo keperluan kerja, sekola utawa alesan liyané.
Suhariyanto nyampékna, seka jumlah 270.203.917 juta jiwa, 56,10 persén penduduk Indonesia ana nang Pulo Jawa yakuwé segedhé 151,6 juta jiwa karo jumlah penduduk paling dhuwur ana nang Jawa Barat yakuwé segedhé 48,27 juta jiwa.
Sementara Hasil SP2020 nganggo dasar jenis kelamin, penduduk lanang seakéh 136,66 juta wong utawa segedhé 50,58 persén. Lah, angger nggo penduduk wadon ana seakéh 133,54 juta wong utawa segedhé 49,42 persén.
Sementara kuwé, Sekjen Kementrian Dalam Negeri Muhammad Hudori nyampékna, jumlah Penduduk Indonesia sing kedaftar nang Adminduk per wulan Désember 2020 segedhé 171.349.889 karo jumlah penduduk lanang seakéh 137.119.901 jiwa lan penduduk wadon seakéh 134.229.988 jiwa. Karo jumlah Kartu Keluarga seakéh 86.437.053.
Hudori ngomong, 55,94 persén penduduk ana nang Pulo Jawa. Dhéwéké uga nyampékna seka Data Kependudukan Seméstér II 2020 uga ana penduduk umuré luwih seka 100 nganti 115 Taun karo jumlah 17.463 jiwa lan kabéh wis nduwéni É-KTP.
Jaréné Hudori, data Kependudukan sing ana dienggo nggo kabéh keperluan nang antarané pelayanan publik, perencanaan pembangunan, alokasi anggaran, pembangunan démokrasi lan penegakan hukum uga pencegahan kriminal. (*)
Discussion about this post