BREBES – Tim unit Réskrim Polsék Bulakamba Kabupatén Brebes winginané bar nangkep Muhadi (21), cah enom sing asalé seka Désa Grinting Kecamatan Bulakamba. Dhéwéké dicekel merga nggarong konter HaPé nang wilayah Désa/Kecamatan Bulakamba, nang awal wulan Mei 2020 ndisit. Aksi Muhadi kuwé uga sempet kerékam kamera sing dipasang nang konter.
Dhéwéké dicekel nang umahé, dina Rebo (12/8) wingi. Sadurungé ditangkep, pelaku wis di inggeng lan slidiki disit daning Tim Unit Réskrim Polsek Bulakamba.
Kepala Unit (Kanit) Résérsé dan Kriminal (Réskrim) Polsék Bulakamba IPDA Tasudin sempet kangélan merga ana perlawanan seka pihak kluwargané pelaku. Tapi, ora let suwé polisi akhiré bisa nangkep pelaku.
Tasudin ngomong, keungkapé kasus nggarong konter HaPe kiyé nganggo dasar laporan seka korban lan hasil penyelidikan. Pelaku yakuwé residivis kasus sing padha nang taun 2017 ndisit. Nggo modusé, pelaku karo ménék gendeng konter lan njebol. Sawisé olih barangé, pelaku latané metu seka lawang mburi konter.
“Aksi pelaku kerekam kamera CCTV ruko konter HaPé kuwé. Korban ngalami tuna total Rp 27 juta luwih,” jelasé.
Pas kuwé, dhéwéké nglanjutna, pelaku nggawa mlayu ana pirang barang dagangan sing kesimpen nang jero konter. Nang antarané, 11 HaPé lan 185 kartu paket internét. Merga kelakuané, pelaku diancem pasal 363 KUHP karo anceman ukuman 7 taun kurungan penjara.
Sementara pelaku, Muhadi ngaku, aksi pembobolan konter telpon seluler pas kuwe gara-gara kepeped kebutuhan nggo badanan.
“Pan badanan ora duwé duwit, mugané nyong lakoni kuwé (mbobol). Barang hasil colongan Smartphoné nyong adol liwat onlen. Lah, nggo pirang Smartphoné lan kuota internét ana sing durung payu,” ngakuné Muhadi nang ngarepé petugas. (*)
Discussion about this post