GUNUNG Slamet wis ping pitu dianjati prawan sing asalé seka Désa Guci Kecamatan Bumijawa Kabupatén Tegal Kiyé. Nggo Ikna Saskia, sing saiki umuré 18 taun, gunung paling dhuwur nang Jawa Tengah kuwé dadi umah keloroné.
Sajegé ésih njagong nang padung SMP, prawan sing seneng mangan pukis kiyé wis hobi manjat. Senajan kluwargané laka sing seneng manjat gunung.
Wayah PanturaPost ketemu Ikna, sosoké ora katon dadi wong sing demen tantangan manjat. Misale kaya ora pantes nggawa gawanan abot, turu nang jero tenda lan liyané. Tapi pandengan kuwé salah. Jebulé Ikna wis kecanduan manjat gunung.
“Angger seneng manjat kuwé sajegé kelas 1 SMP. Pas kuwé, angger pan manjat ngumpet-ngumpet malah mlayu seka umah. Soalé angger poyan maring wong tuwa nggo manjat gunung, ora diolihi malah dioméih,” tuturé maring PanturaPost, dina Minggu (1/11/2020).
Pengalaman pertama manjat gunung Slamet diejak batir. Kebeneran umahé perek karo Gunung Slamet. Seka pendakian pertama kuwé, dhéwéké kepincut lan dhemen maring pucukéng gunung lan nganti saiki ketagihan.
“Nyong wis ping pitu manjat gunung Slamet. Pol-polan manjat seka jalur Permadi pas lagi préi dawa wingi. Gunung nggo nyong yakuwé pelampiasan paling pas wektu ana masalah. Dadi angger lagi putek lan ana masalah ya mlayuné manjat gunung,” jaréné.
Dhéwéké akoni manjat gunung kuwé kesel, gawa barang abot, turu nang tenda, cuaca atis angger nang ndhuwur gunung. Tapi, rasa kesel kuwé ilang sanalika wektu ngnikmati alam. Lan ngileng keindahan sing wong liya arang weruh.
“Apamaning pas lagi nang gunung, mangan pukis kuwé tambah nikmat. Saben manjat gunung kuwé, nyong terusan gawa panganan pukis. Mangan pukis kuwé sapisan mugané gawe wareg weteng pas lagi nang gunung,” jaréné.
Saliyané Gunung Slamet, Ikna wis manjat Gunung Cermai lan Gunung Merbabu. Lan maring ngarepé pan njelajah gunung liyané. Wayah aktifitas manjat kuwé, Ikna terusan ketemu batir anyar lan bareng-bareng nuju maring pucuk pegunungan. “Kuwe pengalaman nyenengna,” jaré dhéwéké.
Tapi, wayah manjat gunung kuwé ora salawasé nyenengna. Hal-hal aneh uga tau dhéwéké alami wayah manjat.
“Pas kuwé nyong loronan karo batir lagi mudun gunung, sawisé seka pucuk lan kondisiné grimis. Sawise manjing jam lima soré, wis molai peteng. Pas lagi metung salah siji pos ana kedadénan anéh. Nang pos kuwé, dhéwék weruh wit-wit nang sekitar gerak tapi bentuké kéwan. Dhéwék loronan nacak tenang lan yakin anjog ngingsor slamet. Akhiré anjog ngingsor slamet. Seka kono kuwé dhéwék krasa anéh soalé dhéwék loronan weruh wit-wit nang pos kuwé kuwé gerak lan bentuké kéwan,” critané.
Tapi kedadénan aneh kuwé, jaré Ikna, ora nyiutna atiné nggo njelajah gunung maning. Dhéwéké ya ora urus omongan batir-batiré sing seneng mojar, “Pan apa sih manjat gunung. Kesel dibayar ora, mending turu énak.”
Sawisé lulus SMA, Ikna dadi model iklan klambi, éndorsé produk, pilem cendek lan akeh liyané. Hasilé, dhéwéké tukokna peralatan manjat.
“Angger olih bayaran seka model, nyong céléngi lan barang kaya kuwé nyong tukokna nggo peralatan gunung,” omongé.
Senajan hobi manjat saiki diolihi daning rong wong tuwané, saiki dhéwéké durung ngarti nganti kapan pan terus manjat. Pastiné pan terus ngnikmati hobiné kuwé, senajan kadang belih direncana. (*)
Disunting: Irsyam Faiz
Discussion about this post