TEGAL – Bencana gempa bumi sing kedadén nang Kabupatén Cianjur, Jawa Barat lagi tanggal 21 November 2022 wingi, rupané dampaké ora mung maring menungsa, tapi uga kéwan ingon-ingonané warga.
Ana pirang rélawan khusus, teka nggo nylametna lan ngrawat kéwan-kéwan kaya kucing lan asu neng lokasi lubar gempa.
Neng antarané yakuwé Founder Rumah Singgah Kucing Rescue Faris, Titik Herawati seka Kota Tegal sing nggabung bareng karo tim khusus nangani kéwan.
Titik nggabung bareng karo Clow Bandung, Yayasan Sintesis Animalia Indonesia, lan Rudi Meong Solo. Dhéwéké pada ndirikna posko kéwan.
Titik ngaku ngrélakna waktuné nggo teka langsung maring Cianjur nggo ngréwangi kéwan sing ana nang lokasi gempa.
Bantuan sing diwékena yakuwé panganan nggo kéwan ingon-ingonan, lan ngerawat sing lara utawa luka-luka.
“Iya kiyé nembé balik seka Cianjur, ndilalah ana misi nggo kéwan sing kena dampak gempa Cianjur,” jaré Titik maring PanturaPost.com, dina Kemis (1/12/2022).
Titik ngungkapna, dhéwéké nemoni ana puluhan kéwan sing pada luka-luka. Malah akéh sing kencoten soalé ora kerumat daning sing nduwé sing lagi kena blai.
“Ana puluhan kucing lan asu luka neng sikilé, endas, lan rai. Lan akéh nemen sing kencoten, akéh kéwan sing trauma lan strés,” jaré Titik.
Titik ngungkapna, ana pirang kéwan sing akhiré kudu diévakuasi. Kéwan sing luka lan strés pan dirawat nggo ppemulihan nang tempaté rélawan pecinta kéwan.
Titik nambahi, senajan teka nggo nylametna kéwan-kéwan sing luka udu berarti ora merhatikna warga sing kena dampak gempa.
Pihaké uga teka sekalian mékena bantuan maring warga sekitar. “Mesthi dhéwék maring Cianjur dadi rélawan. Mékena bantuan maring masarakat Cianjur, lan kéwan ingonan sing kena dampak gempa,” pungkasé.
Discussion about this post