BREBES – Nang Kawasan Gunung Lio-Simpur, Kecamatan Banjarharjo, Kabupatén Brebes, winginané bar ana wong dibegal, dina Senen (14/9/2020). Begalé ana telu, latané mlayu maring alas lubar ninggalna mobil colongané nang Désa Pasirpanjang, Kecamatan Salem.
Anggota Unit Intel Kodim 07013 wilayah Salem Serma Wartono ngiyakna peristiwa kuwé. Peristiwa kedadén sekira jam tengah lima soré. Korban arané Suwarsono (68) wong seka Kabupatén Cilacap.
Nurut Wartono, mobil korban sing mereké Kijang nomer polisiné R 9457 DB kuwé disewa daning pelaku. Bareng karo korban, ke telu pelaku mangkat seka Cilacap lagep pan maring Tegal.
Tapi saanjogé nang Ketanggungan, Brebes, mobil malah diarahna maring Kecamatan Banjarharjo. Saanjogé nang daerah Simpur, korban diantemi, disekep, lan diuduna seka mobil. Korban ngalami luka ora patia berat nang awak nggon gigir.
Ke telu pelaku latané mlayu lan nggawa mobilé korban. Pelaku sempet muter-muter nang Kecamatan Salem. Pelaku uga sempet nakokna maring warga arah dalan maring arah Bumiayu utawa Tegal.
“Pelaku muter antara Désa Wanoja-Bentarsari Gandoang. Pelaku takon maring warga lan pelaku diarahna nggo muter dalan Lio-Simpur,” jaré Wartono.
Pelaku sing diperkirakna ora apal arah dalan kéderen lan ninggalna mobil nang pinggir dalan. Petugas ya nemu mobil kuwé lan langsung ngamana sekira jam tengah enem soré.
Sementara kuwé, korban sing diuduna posisi tangané kegubed, gagiyan njaluk tulung maring warga. Anggota Polsék, Koramil lan warga langsung nguber pelaku.
“Seka lokasi ditemuknané mobil, ana sekitar 300 wong latané nguber pelaku. Nyebar, nyekat dalan lan alas,” ungkapé.
Ngesuké, Slasa (15/9/2020), begal sing siji akhiré bisa dicekel, jam enem esuk. Pelaku sing arané Heri Siswanto (35) dicekel daning warga wayah lagi nyéwa ojeg nang Désa Pasirpanjang, Kecamatan Salem.
Pelaku sing dicekel kuwé ciri-ciriné awak lemu lan ana tattoné nang ke loro lengen tangané. Saiki wis diamana nang Polsék Salem.
Nurut Wartono, pelaku bisa dicekel merga ana laporan seka tukang ojeg sing arané Taru (53). Dingerténi motoré disewa daning si pelaku. “Esuk-esuk ana wong sing ngojég, tapi nyurigakna. Akéh tattoné,” jaréné.
Merga curiga, Taru njaluk mandeg maring brengkel nggo ndandani ban. Nang kana Taru ngaku ora omong-omongan babar blas.
Taru kemutan, awit sawengi warga lagi luruh pelaku begal nang dalan Lio. Nyambi apen-apen melu ndandani, Taru gagiyan njaluk tulung maring warga. “Deleng sing jero brengkel, dhéwéké ora curiga. Dadiné nyong langsung lapor,” jaréné.
Wartono bareng karo warga ya gagiyan nggawa pelaku karo nganggo motor maring kantor polisi nggo dipriksani maning.
Korban Apén-apén Mati
Kepala Unit 1 Pidana Umum Satréskrim Polrés Brebes, Aiptu Titok Ambar Pramono, pelaku étungané sadis soalé sempet ngguwang korbané maring jurang nang tengah alas.
Dhéwéké ngungkapna, wayah kedadénan korban sempet apén-apén mati. Upaya kuwé dilakoni nggo mbodoni pelaku ebén cepet lunga. Untung, korban akhiré bisa nylametna awaké dhéwék sawisé njaluk tulung maring warga.
Merga kedadénan kuwe, korban ngalami luka-luka nang nggon dada lan endasé. “Wayah ana nang ngingsor jurang, korban pura pura mati ebén pelaku lunga, sawisé kurang luwih 10 menit korban mbrangkang manjat mendhuwur lan njaluk tulung maring warga nggo dijujugna diobati maring Puskesmas lan nglapor maring Polisi,” omongé Titok.
Saliyané ngamana pelaku lan mobil Toyota Kijang LGX, polisi uga ngamana barang bukti liyané yakuwé klambi ndéké korban sing klopot daning getih. Gara-gara kasus kiyé, pelaku diancem ukuman pidana kurungan nang ndhuwur mang taun penjara. (*)
Disunting Daning: Irsyam Faiz
Discussion about this post