SLAWI – Tim Opsnal Satresnarkoba Polres Tegal nyekel wong telu pengedar narkoba golongan I jenis ganja garing.
Kasus sing pertama yakuwé OP (24), warga Desa Kaligayam, Kecamatan Talang, Kabupaten Tegal dan WRA (23), warga Dusun Bendo Desa Ngaglik, Kecamatan Bulukerto, Kabupaten Wonogiri. Keloroné dicekel nang Bengkel Las Desa Pacul, Kecamatan Talang, Kabupaten Tegal lagi dina Saptu, (2/09/2023).
Kapolres Tegal AKBP Mochammad Sajarod Zakun diwakili KBO Satresnarkoba Polres Tegal Ipda Ahmad Jony njelasna yén pelaku ngédarna narkoba jenis ganja garing metung medsos.
Jaréné, salah siji pelaku dicekel wektu lagi nglayani sing pan tuku neng njero bengkel las Desa Pacul, Kecamatan Talang, Kabupaten Tegal.
Sawisé pelaku diintrogasi lan nglédah tempat kuwé, Tim Opsnal Satresnarkoba nemukna salah siji pelaku liyané sing lagi umpetan neng ngingsor kathil karo posisi ngatang-ngatang.
“Barang bukti sing dhéwék amana yakuwé rong puluh paket ganja garing, telung linting ganja garing, ganja garing sing dibungkus plastik bening. Total barang bukti sing ditemukna 310 gram ganja garing,” ungkapé Ahmad Jony maring wartawan dina Jemuah, (8/09/2023).
Gara-gara kelakuané, keloro pelaku kena Pasal 132 Ayat (1) JO Pasal 114 Ayat (1) Subsider Pasal 111 Ayat (1) UU RI No.35 Tahun 2009 Tentang Narkotika Jo Pasal 55 Ayat (1) KE-1e KUHP.
“Anceman ukumané paling suwé 20 taun penjara lan denda paling akéh Rp10 miliar,” pungkasé.
Angger kasus keloro kuwé dicekelé sa wong pengedar jenis mbako gorilla sing inisialé MTA (25), warga Desa Bandasari, Kecamatan Dukuhturi, Kabupaten Tegal.
Pelaku dicekel nang Desa Dampyak, Kecamatan Kramat, Kabupaten Tegal lagi dina Saptu, 2 September 2023 wingi. Seka tangané pelaku, polisi nyita sa paket mbako gorilla karo bobot 17,86 gram.
“Seka tangané tersangka, dhéwék bisa ngamana sa paket mbako gorilla karo bobot 17,86 gram sing dibungkus karo plastik klip putih bening latané disimpen neng njero bekas bungkus Richeese,” jaré Ipda Ahmad Jony.
Jaréné, wektu ditangkep, pelaku ngaku wis nggawa lan nyimpen sa paket mbako gorilla. “Pelaku nyimpen sa paket mbako gorilla kuwé neng ngingsor wit pinggir dalan manjing Desa Dampyak lan ditutupi karo batu bata,” omongé.
Pelaku ngédarna narkotika golongan I jenis mbako gorilla kuwé metung medsos. “MTA tugasé dadi pengedar, neng endi pelaku nduwéni stok narkotika golongan I jenis mbako gorilla lan ngédarnané metung onlén utawa metung medsos,” tuturé.
Gara-gara kelakuané, pelaku kena Pasal 114 Ayat (2) Subsider Pasal 112 Ayat (2) UU RI No.35 Tahun 2009 tentang Narkotika.
“Pelaku keancam ukuman pidana paling suwé 20 taun lan denda paling akéh Rp 10 miliar,” pungkasé. (*)
Discussion about this post