TEGAL — Puluhan umah nang Dukuh Ratna, Désa Sigedong, Kecamatan Bumijawa, Kabupatén Tegal, ruwag dihampad lisus, dina Saptu (9/1/2020) soré. Senajan laka korban jiwa, tapi kedadénan kuwé nggawé puluhan umah sing nang kana pada ruwag.
Rélawan PMI Kabupatén Tegal, Abdul Kholik, ngiyakna kedadénan kuwé. Mauné, sekitar jam rolas awan cuaca nang désa kuwe katon cerah. Tapi ujug-ujug mendung kandel lan langsung teka angin lisus.
“Jaréné keterangan warga sawisé mendung, 20 menit latané teka angin lisus lan ngampad sa pedukuhan sing ana nang Désa Sigedong. Sekira 10 menit angin lisus ngampad, latané mudun udan cilik,” jaréné.
Gara-gara dihampad angin lisus kuwé, 24 umah ndéké warga ruwag lan ana sing plaponé pada mabur. Rinciané, 19 umah bodhol énténg, 4 umah bodhol sedeng, lan 1 umah bodhol jahat. Umah sing ngalami bodhol jahat yakuwé umah ndéké Suswanto, nang RT 3/RW 2.
Baca Juga
“Ruwagé rata-rata nang nggon plapon umah. Akéh sing ucul gara-gara dihampad angin,” ungkapé.
Lubar udané mandeg, warga diréwangi rélawan lan petugas seka TNI/Polri kerigan mbresihna puing-puing lan ndandani plapon umah sing pada ruwag. Kedadénan kuwé uga ora nggawé warga sing umahé ruwag pada ngungsi.
“Iya mau warga pada kerigan ndandani plapon umah. Ndéyan pan ditutugna ngésuk maning,” jaréné.
Sementara kuwé, saliyané ndatani, Badan Penanggulangan Bencana Daérah (BPBD) Kabupatén Tegal langsung nyalurna pirang bantuan nggo warga sing umahé pada ruwag.
“Personil BPBD wis mana lan nyerahna ana pirang bantuan. Neng antarané mie instan, terpal lan liya-liya,” omongé rélawan BPBD Kabupatén Tegal, Akrimatul Auza. (*)
Discussion about this post