MAN sapa sing ngerti logo Tegal gawéané sapa? Bab kiyé sing ndadékna jakwir-jakwiré Jon Dapuk mbangkana penasaran. Dongé wongé sapa? Kalah mumet, jakwir-jakwiré mujar maring Jon Dapuk nalika bengi kuwé kumpul nang Pos Ronda.
“Bengi kiyé jakwir-jakwir penasaran péngin ngerti wongé sapa sing gawé logo Tegal?” takoné Sidul maring Jon Dapuk miwiti mbuka omongan.
Kaya biasané Jon Dapuk kur meneng sadurungé jakwir-jakwiré pada mbalang omongan.
“Iya Jon. Yanu kayong penasaran…” omongé Darto.
“Nah kuwé sing ngganjel nang pikiran jakwir-jakwir, Jon. Coba wedarna ében wong-wong Tegal pada ngerti?” sambung omongané Kapér.
Kaya biasané sadurungé Jon Dapuk njawabi pitakonané jakwir-jakwiré, déwéké nyuled sigarété latané nyedot rong sedotan rokoké. Kaya biasané Kapér uga nyomot saeler rokoké Jon Dapuk.
“Critané kaya kiyé!” Jon Dapuk mbuka omongan.
Jakwir-jakwir Jon Dapuk molai pasang kuping. Siap-siap ngrungokna Jon Dapuk mbabar sejarah anané logo Kota Tegal. Jaré déwéké, ning taun 1972 Kota Tegal nganakna lomba gawé logo. Sing mélu lomba sekandang bentang para disainer. Salah sijiné pelukis Hasan Bisri.
“Kowen paham crita kuwé sing sapa?” takoné Kapér nyetop omongané Jon Dapuk.
“Wawancara langsung karo Hasan Bisri.”
“Lanjut!” omongé Kapér.
Jaré Jon Dapuk, waktu samana Hasan Bisri ngirim gambar logo telung dina sadurungé lomba ditutup. Ora dinyana, logo gawéané menang gén olih surat sing panitia supaya teka nang acara penyerahan penghargaan. Tapi apa sing kedadén? Nalika pengumam diwaca, déwéké kagét ora ketulungan.
“Bisané Jon?” takoné Darto.
“Juarané ana telu! Siji wadon, lan loroné lanang termasuké Hasan Bisri,” omongé Jon Dapuk nirukna omongané Hasan Bisri nalika wawancara zaman déwéké mégin dadi wartawan koran mingguan ibukota.
“Kayong anéh ana lomba logo juarané telu,” cletuk Sidul.
“Brarti langka sing juara siji?” takoné Darto.
“Langka! Juarané kroyokan.”
“Anéh!” celetuk Kapér.
“Jaré Hasan Bisri, sluruh isi gambar nang logo awit wujud kapal, warna uga motifé, kabéh gawéané Hasan Bisri! Sing séjén kur bingkéné gél! Embuh gawéané sapa,” Jon Dapuk rinci njelasna.
Jon Dapuk nglanjutna. Jaré déwéké ngutip omongané Hasan Bisri, gerigi nang ngingsor gambar kapal, artiné nglambangna Kota Tegal sebagé kota industri, gambar kapal layar nglambangna angger Kota Tegal sebagé kota maritim, sedeng gambar geni sing mulad-mulad sanduwuré kapal, nglambangna semangaté masyarakat Tegal.
“Kuwé gawéané Hasan Bisri kabéh?” takoné Darto.
“Iya.”
“Bisané Hasan Bisri ora usul maring panitiané?” takoné Sidul.
“Déwéké ora gelem ribut,” omongé Jon Dapuk.
“Akhiré?” takoné Kapér.
“Lomba logo juarané wong telu!”
“Umumé lomba juarané: siji loro telu. Kiyé kayong wagu temen? Lomba juarané telu!” timpal Darto.
“Tegal pancén laka-laka. Sing ngempra dadi biasa. Sing biasa dadi ngempra!” sosor Sidul. Sing dimaksud tembung “Ngempra” ariné “Ngawur”.
“Adong ora laka-laka dudu Kota Tegal!”
“Bener Jon, wong crita Martoloyo – Martopuro bé ngemprané mbangkana-kana ka… Masa sih? Gara-gara laka pejaratan, wong loro mati bareng jasadé ngilang? Hahahahaha….” Omongé Kapér karo nyekakak.
“Ana maning Pér?” clemongé Sidul.
“Apa kuwé?” takoné Sidul.
“Wong siji, dina kelahirané werna loro!”
“Sapa kuwé?” takoné Darto.
“Ki Gedé Sebayu! Nang Kota Tegal adégé kota tanggal 12 April. Nang Kabupaten Tegal adage wilayahé tanggal 18 Mei. Padahal dasaré nganggo pelantikané Sebayu nalika dadi Juru Demang. Pibén ora laka-laka?” ujaré Sidul kalah bingung.
“Hahahahaha….”
Sekal kuwé jakwir-jakwiré nyekakak saporété. Jon Dapuk nyenggir kuda. Nang ati mujar: Tegal pancén laka-laka! (*)
—–
Lanang Setiawan, Seniman dan Penulis Novel.
Discussion about this post