SLAWI – Polisi nang Tegal bar nangkep dukun dobolan sing arane Saefudin (34) seka Desa Kaliwungu, Kecamatan Balapulang. Dukune ditangkep soale wis nyucus rangda sing huruf pertamane IIM (40) sing tembe dijak kenalan. Moduse, dhewek ngrayuni korban lan ngaku bisa nyabut susuk lan ngguwang pengaruh negatif sing ana nang awake korban.
Maune, pelaku kenalan karo korban, yakuwe warga Desa Tonggara, Kecamatan Kedung Banteng nang tanggal 16 Mei wingi, nang acara buka puasa bareng. Soale kayong madan seneng, pelaku jaluk tulung karo batire eben dikenalna karo korban.
“Kedadenan nang umahe korban nang dina Jemuah, tanggal 29 Mei wingi,” omonge Kasat Reskrim, AKP Heru Sanusi, wayah gelar ungkap kasus, dina Senen (13/7).
Dadi, lanjute Heru, sawise kenalan, pelaku sering kirim WA maring korban. Malah, lewat WA-nan, pelaku ngomong ari ana benda ghaib nang awake korban. Lan angger ora ditokna dadine pan nrawasna. Latane, pelaku ya apen-apen dadi dukun sing bisa mbresihna aura negatif.
Barang kaya kuwe, korban ya ngandel karo omongane pelaku lan pan nggo nglakoni ritual. Syarate korban kudu adus kembang, banyu suruh, uyah krosok lan lenga.
“Dadi moduse kaya kuwe, korban dijaluk adus kembang. Kesempatan kuwe ya dimanfaatna pelaku nggo nyucus korban,” jarene.
Seka hasil pemeriksaan, korban dicabuli ping pindo nang umahe. Malah, pas nyucuse kuwe dilakoni nang ngarep anake korban sing esih cilik.
Tapi nang adepan petugas, pelaku sempet mungkir lan duwe alesan ari nyucuse dilakoni merga dasar seneng karo seneng.
“Iya bener tak cucus ding nyong, tapi kuwe dasare seneng karo seneng, lan dheweke njaluk ditambani,” kata pelaku.
Saliyane ngamanna pelaku, polisi uga ngamanna ana pirang barang bukti. Nang antarane yakuwe bahan sarung, bahan longdress, gunting, baskom, lan plastik sing dienggo ritual.
Gara-gara kelakuane, pelaku dijerat pasal 289 lan pasal 378 subsider pasal 379 KUHP karo anceman ukuman suwene 9 taun penjara. (*)
Discussion about this post