KOTA TEGAL — Wabah penyakit mulut dan kuku (PMK) nang pirang-pirang daérah nang Indonesia sempet nggawé pedagang lan peternak kéwan kurban kuwatir. Senajan kaya kuwé, hal kuwé belih nyurutna optimismé pedagang kéwan kurban nang Tegal nggo nawani kéwan ternaké sing tetep aman lan waras.
Salah siji peternak, Sudarmono (40) alias Buyung warga Désa Mejasem, Kecamatan Kramat, Kabupatén Tegal malah nggaransikna kéwan ternaké bébas seka pirang-pirang jenis penyakit utawané wabah PMK sing lagi merebak.
“Dhéwék pastikna kéwan kurban dhéwék kepantau keséhatané. Baik seka kebersihan kandang, wéinan pakan ngantikan prawatan rutin karo dokter kéwan,” jaré Buyung wayah ditemoni pas lagi nang Gedung DPRD Kota Tegal.
Buyung dhéwék ngedol sapi jenis simetal limosin lan lokal (PO), molai rega Rp 20 juta ngantikan Rp 75 juta. Kéwan kuwé, ditekakna seka pirang-pirang daérah nang Jawa Tengah, kaya Wonogiri, Sukoharjo tekan Blora.
Seka segi prawatan, Buyung ngaku sapi sing diduwéniné kepetung khusus wayah dirawat. Dimolai pas sapi ditekakna seka luar kota sing luwih ndisiti ngleboni karantina lawasé rong minggu.
Sawisé kuwé, sapi-sapi kuwé dipisahna cocog karo jenis lan klompok umur. Nggo wéinan pakan, diwékena karo gizi terapik sing ngliputi konsentrat, ampas tahu ngantikan vitamin B komplék.
“Dhéwék uga tekakna dokter kéwan seka dinas kekait saben saminggu pisan. Penyemprotan kandang karo disinféktan uga dhéwék inténsifna sadina minimal ping pindo,” tegasé.
Ngantikan saiki, ana sekitar 50 sapi karo abot telung kwintal ngantikan sa ton, sing siap nggo dikurbana wayah perayaan Idul Adha.
Buyung nambahi, tetuku sapi kurban bisa dilakoni karo langsung nekani peternakan sing ana nang Désa Dampyak, Kecamatan Kramat, tepaté sewelah wetané Kali Ketiwon.
“Kéwan kurban bisa langsung dhéwék jujugna maring tempat tujuan karo apik, tanpa ana biaya tambahan. Malah, dhéwék uga siap nggo ngrawat, angger sing tuku ngarep-arep nggo dikirim wayah pan Idul Adha,” imbuhé.
Selama dititipna, sing tuku ora kudu ngrogoh sak maning utawané dompét nggo biaya prawatan. Sebab, Buyung bareng karo timé siap nggo méin prawatan gratis lan kejamin.
“Sejauh kiyé tetuku kéwan kurban nang tempaté wis tekan sekitar 30 buntut. Mayoritas sing tuku teka seka pirang-pirang daérah nang Brebes lan Tegal Raya,” pungkasé. (*)
Diedit daning: Irsyam Faiz
Discussion about this post