SEMARANG – Gubernur Jawa Tengah, Ganjar Pranowo njaluk kabéh masarakat Jateng sing ana nang Jakarta pada ngrewangi lan nyuksesna Pembatasan Sosial Berskala Besar (PSBB) Jakarta. Jare Ganjar, langkah kuwé anu wujud sopan santuné dadi wong pendatang utawa wong ngranto.
Ganjar njaluk kabéh wargané nggo sekuat tenaga ebén pelaksanaan PSBB nang Jakarta mlaku sesuai karo rencana. Ganjar ngaku wis inténs komunikasi karo Pemda DKI kekait hal kuwé.
“Penghubung Jateng nang Jakarta dhéwék njaluk inténs komunikasi karo Pemda DKI, apa sing bisa Pemprov Jateng rewangi nggo nyuksésna PSBB, khususé masarakat Jawa Tengah sing ana nang kana. Paguyuban warga Jateng sing ana nang kana, nyong njaluk nggo ngrewangi ngrampungna persoalan sing ana nang kana, sing wis dadi putusan Pemda DKI,” omongé Ganjar lubar mimpin rapat percepatan penanganan COVID-19 nang kantoré, dina Senen (14/9/2020) .
Jaré Ganjar, langkah kuwé anu wujud sopan santun dadi wong pendatang. Diarep-arep, warga bisa ngrewangi apa sing bisa dilakoni nggo suksesé program Pemda DKI.
Baca Juga
“Kiyé sopan santuné dhéwék, mugané dhéwék bisa ngréwangi apa sing ana nang Jakarta ebén mengko keputusané bisa suksés. Lan masarakat bisa waras kabehané,” tambahé.
Ganjar uga bombong ari komunikasi inténs karo Pemda DKI sadurungé pelaksanaan PSBB mlaku lancar. Nganti saiki, durung ana masalah sing nyembul merga putusan kuwé.
“Nyong ngindangi angger ana wong mudik, nganti wingi madan mudun, artiné langka pergerakan lan malah luwih satitik dibanding sadurungé. Dishub tak kongkon nggo ngileng terus,” jaréné.
Kekait nasibé warga Jateng sing ana nang Jakarta, Ganjar uga wis njaluk Dinas Sosial nglakoka komunikasi. Dhéwéké bombong, soalé Pemda DKI pan njamin anane panganan karo nggawé pawon umum nang saben RW.
“Dadiné urusan mangan wis rampung. Dhéwék durung nglakoni tindakan sing luwih seka kuwé, tapi dhéwék ngileng nggal dina,” jaréné.
Ganjar uga wanti-wanti karo kabeh warga Jateng nang Jakarta ebén ora pada mudik. Soalé jare dhéwéké, Pemda DKI wis ngatur kabehané lan dipastikna pan luwih kepenak dibanding pengalaman PSBB pertama.
“Pan digawekna pawon umum nang saben RW, mugané mengko sing angél mangan, bisa teka mana. Ora susah mudik, angger ana sing kangélan monggo komunikasi karo dhéwék. Kanca-kanca Penghubung Jateng sing ana nang kana mesti wis ngarti apa sing kudu dilakoni, termasuk relawan sing wis pengalaman wayah PSBB pertama,” pungkasé.
Anu mung nggo informasi, DKI Jakarta saiki lagi nerapna maning PSBB jilid ke loro nang dina Senen (14/9). Diberlakuknané PSBB kuwé nggo meték jumlah nularé virus COVID-19 sing lumayan gedhé nang daerah kuwé. (*)
Discussion about this post