BREBES — Kepala Badan Penanggulangan Bencana Daérah (BPBD) Brebes, Nushy Mansur, ngomonga nang Kabupatén Brebes wilayah Kidul sering kedadén longsor. Penyebabé, gara-gara bodholé hutan lindung nang lereng Gunung Slamet alias wis pada gundul.
Ora sacuil hutan lindung nang wilayah kidul Brebes sing saiki fungsiné dadi nggo kebonan. Tambah amba alas sing digunduli lan nggo tandur-tandur apa baé. Termasuk nang hutan lindung sing ana nang léréng Gunung Slamet.
“Nang posko pendakian Gunung Slamet uga hutan lindung wis padang njinggrang. Lan kiyé sing kudu dhéwék waspadani, soalé digunduliné parah nemen lan nggawé bencana,” omongé Nushy Mansyur, dina Rebo (13/1).
Jaréné, alas sing digunduli paling parah kedadén nang wilayah Kecamatan Sirampog lan Paguyangan. Malah, kondisi kuwé dadi penyebab kedadéné longsor nang wilayah kidul soalé alas sing kondisiné mrihatinkna gara-gara wis gundul.
Baca Juga
“Saliyané nang rong kecamatan kuwé, alas sing digunduli uga kedadén nang pirang titik nang wilayah kecamatan séjén nang wilayah Brebes Kidul,” pungkasé. (*)
Disunting Daning: Irsyam Faiz
Discussion about this post