BREBES – Patang warung nang Désa Songgom Lor Kabupatén Brebes entong prontong dipangan geni, dina Rebo (11/11/2020) awan, sekitaréng jam tengah loronan. Warung sembako sing kekobong ana nang dalan Pancasakti Songgom Lor.
Untung baé laka korban jiwa neng kedadénan kuwé. Mung baé, kabéh bangunan lan isiné entong prontong dipangan geni. “Awal kobongan kedadén nang warung ndéké mbok Muning sing dodolan bengsin karo sembako. Geni cepet nemen mrambat maring warung-warung nang sebelahé,” omongé Kapolsek Songgom AKP Sunarto.
Dinyana, kobongan kedadén merga ana listrik sing konslet nang salah siji warung kuwé. Tuna diperkirakna tekan Rp 800 juta luwih.
“Belih suwé sawisé olih laporan kedadénan kobongan kuwé, rong unit mobil Damkar teka maring lokasi nggo nyirepna geniné,” jelasé.
Kedadénan kobongan kuwé sempet nggawé rumbengan atusan warga sing penasaran nggo ngileng luwih perek. Saliyané kuwé, uga sempet nggawé macet, merga kendaraan pating ngoler-ngoler nang ngarep lokasi patang warung sing kekobong. (*)
Discussion about this post