BREBES — Gara-gara kegerus arus kali, dalan antardésa nang Kecamatan Salem, Kabupatén Brebes, enggal tugel gara-gara longsor. Rong désa sing ana nang Kecamatan Salem keancem keisolasi.
Anggota Kodim 0713 Brebes, Serma Wartono ngomong, jalur kiyé yakuwé dalan siji sijiné sing nyambungna antardésa.
“Kondisiné madan nrawasna, soalé tebingé jeroné nganti patang méter. Latané pinggiran dalané uga renteng renteng dadi sapa baé kudu ati ati. Mung motor karo wong mlaku tok,” jaré Wartono, dina Jemuah (10/12/2021).
Jaréné, dalan longsor sawisé udan gemerot sing kedadén nang kawasan kuwé pas lagi dina Rebo (8/12/2021). Nggo penyebabé merga Kali Cigunung lubér lan banyuné nggerus nggon ngingsor dalan.
Akibaté, dalan sing nyambungna antara Désa Ciputih karo Désa Gandoang lan Désa Kadumanis longsor sadawanéng telungpuluh méter. Dalan sing asalé nduwéni amba telung méter, saiki mung ngengah sekitar sa méter.
Sawisé kedadénan kiyé, mobil ora bisa nglinter. Nggo sementara, mung motor lan wong mlaku sing bisa nglinter.
Kegiatané warga uga kehambat. Warga kuwatir nglinter nang dalan kiyé gara-gara kondisi dalan sing bisa diklinteri pada mlekah-mlekah.
“Sabeneré ana dalan liya, tapi kuwé dalan désa. Tapi nggo kegiatan dinanan ngliwati dalan kiyé terus,” imbuhé.
Sementara kuwé, Lurah Gandoang, Warkono ngomong, dalan kuwé rawan tugel kapan terus terusan kegerus banyu kali. Rong désa masing-masing Dusun Tangerang Désa Ciputih lan Désa Gandoang bisa keisolasi kapan dalan kuwé pedot total.
Pihaké ya njaluk Pemkab Brebes gagiyan tanggap karo kondisi dalan kiyé. Pasalé dalan kiyé yakuwé dalan utama sing dibutuhna warga.
“Nyong kuwatir pedot. Soalé rong désa pan keisolasi. Ana dalan désa alternatif nang Désa Ciputih hasil TMMD, tapi kondisiné ésih watu lan sirtu. Mukur jaluré luwih adoh soalé muter,” jaré Warkono. (*
Disunting: Irsyam Faiz
Discussion about this post