BREBES — Rega rajungan nang Kecamatan Losari, Brebes wis rong wulan kepungkur lagi mlorod. Akibaté, puluhan nelayan rajungan nang wilayah Désa Prapag Kidul lan Désa Prapag Lor, Kecamatan Losari Kabupatén Brebes ora mayang alias nganggur.
Jaré tokoh masarakat nelayan kono, Muhaemin Primawan, anjlogé rega rajungan kedadén sajegé wulan puasa wingi. Sadurungé rega daging rajungan karo kualitas standar kuwé tekan Rp 370 éwu per kilogram. Saiki, regané mudun ngantikan Rp 110 éwu per kilogram.
“Angger ndisit rega daging rajungan per kilogram tekan Rp 370 éwu, kuwé karo kualitas standar. Sedengé saiki regané Rp 110 éwu per kg, kuwé uga karo kualitas super,” jaré Muhaemin Primawan, dina Jemuah (1/7/2022).
Belih mung daging rajungan sing wis dikupas tok sing mudun. Rega rajungan sing ésih wutuh uga mudun. Yakuwé sing mauné tekan Rp 150 éwu per kilogram, saiki mung Rp 30 éwu per kilogram.
“Gara-gara muduné rega rajungan kiyé, akéh para nelayan sing ora mayang. Hal kiyé merga biaya operasional sing lumayan dhuwur ora sebanding rega rajungan sing regané anjlog,” jaré wong lanang sing uga dadi anggota DPRD Brebes kuwé.
Anjloké rega rajungan duwé dampak neng penghasilan para nelayan, karyawan lan tenaga pengupas sing akéh mandeg. Merga kuwé, dhéwéké ngarep-arep pemréntah bisa luruh solusi nggo ngatasi masalah kiyé.
“Rega sing terus anjlog jelas duwé dampak gedhé nggo atusan nelayan utawaha tenaga kupas rajungan. Dhéwék ngarepna pemréntah bisa gagiyan luruh solusi masalah kiyé. Dadiné, para nelayan nang Brebes khususé nang Prapag Kidul lan Prapag lor bisa mayang maning,” pungkasé. (*)
Discussion about this post