ORA béda menungsa, genderwo uga duwé hasrat péngin kawin. Bléh tanggung-tanggung, njaluk kawiné karo menungsa. Ajib mbangkana ajib! Genderwo njaluk kawin, opo tumon?
Kiyé pernah kedadén diranapi warga Pedukuhan Karangdawa, Kecamatan Tegal Timur, Kota Tegal. Sebut baé arané Komar. Jon Dapuk tau ngliput bab kuwé nalika gégéran.
Nang bengi kuwé, Jon Dapuk mbabar bab sing nganéh-nganéhi. Jakwir-jakwiré kosih kegugu. Setengah percaya setengah ora. Mangmang tapiné nyata. Apa sing diomong Jon Dapuk, jakwir-jakwiré percaya. Soalé status Jon Dapuk wartawan lan emoh goroh. Kanggo déwéké, goroh sawiji prihal sing ndadékna wong sajagad bléh bakalan ngandel adong mrekéca.
Ajarané wong tuwa loroné. Wanti-wanti sajroné déwéké manggon nang alam dunya, poma rong poma aja goroh. Aja ngapusi uga aja nglarani ati. Wong sing dilarani lan sing digorohi, bisa baé nrima. Tapiné Pengéran Allah mboten kerso, tibané apes disangga déwék. Mula kuwé, jakwir-jakwiré ngandel maring critané Jon Dapuk sebab déwéké nyekeli naséhat wong tuwané.
“Kayong kegugu enyong. Ana genderwo njaluk kawin!” Omongé Sidul.
“Sing gawé nyong éram, njaluk kawiné karo menungsa!” Sambung omongané Kapér.
“Jalan critané kepimén, Jon?” takoné Darto. Kayong ora sabar kepéngin ngerti.
Kaya biasané Jon Dapuk ora sagseg njawabi pitakonané jakwir-jakwiré. Déwéké sekal njukut wédang latané nyuput sasruputan. Bar kuwé nyuled rokok. Kaya biasané tangané Kapér nyomot saeler rokok dékéné Jon Dapuk sing nyanding nang ngarepé.
“Critané kaya kiyé!” omongé Jon Dapuk.
Jakwir-jakwiré pasang kuping. Siap-siap ngrungokna Jon Dapuk mbabar crita. Jaré déwéké, nang bengi kuwé Komar lagi turu angler kambén bojoné. Tapi embuh tekané sing endi, Komar nglilir sebabé mambu tembelék lancung breng-brengan. Penyangkané, bojoné ora adus sadina muput.
Dileng daster bojoné laka kotoran tembelék lancung sing némpél. Tapi éramé mambu breng-brengan ora ilang-ilang. Déwéké penasaran. Sajeroné penasaran, déwéké ngrajug. Jebul sing nggléléng nang jéjéré dudu bojoné, tapiné genderwo sing mangli rupa mémper bojoné.
“Éh… genderwo bisa monglah-manglih, nyrupai menungsa ya Jon?” Kapér kegugu. Éram.
“Kayong mblaéni ya?” sambung Darto.
“Arané baé bangsa alus. Sewayah-wayah monglah-manglih rupa! Wis Jon dilanjut,” omongé Sidul sekaligus mréntah Jon Dapuk nerusna critané.
Jaré Jon Dapuk, sauwisé Komar sadar, dong sing lagi turu dudu bojoné, Komar ndadak culag saporété. Déwéké mamprang-mamprang.
“Bréngsék kowen! Bisané nang kéné, ha?! Pan apa kowén?!” omongé Jon Dapuk nirokna omongané Komar nalika wawancara.
“Enyong péngin dikawin sampéyan!” jawabé genderwo waktu samana.
“Kawin ndasmu pokah!” sentak Komar maring genderwoné.
“Winginané enyong nuruti sampéyan, gelem pindah panggonan. Saiki enyong njaluk dikawin!” jawabé genderwon sing ditirukna daning Komar maring Jon Dapuk.
Jalaran séwot, lanjut critané Jon Dapuk, latané Komar manca mantra. Ujug-ujug genderwoné nangis ngglolo. Ampun-ampunan.
“Saiki bojoné enyong nang endi?” takoné Komar maring ganderwo.
“Nang istané enyong.”
“Saiki gawa méné. Gagiyan!”
Kaya trilap genderwo mencirat. Ora suwé bojoné Komar sing mégin turu angler, dibalékna.
“Saterusé pimén Jon?” takoné Sidul.
“Genderwoné ngutir-ngutir, kamigila.”
“Yanu takon Jon,” omongé Darto.
“Iya To. Pimén?”
“Bener genderwo kuwé duwé istana?”
“Sing kasebut istana, ora liya kur witwitan!”
“Ha?!”
Jakwir-jakwiré Jon Dapuk ngrajug.
“Dadi bojoné Komar, persisé didalah nang endi, Jon?” takoné Kapér.
“Bojoné Komar dudu turu angler nang kasur empuk, tapiné ditangsangna nang pang witwitan!”
“Éh.. kayong nrocok ya?” omongé Sidul.
Sepi sakléndaban. Pengangené jakwir-jakwiré Jon Dapuk rasané mblandrang maring endi-endi ora. Tapi ujung-ujungé, penalaran jakwir-jakwiré Jon Dapuk ora nyandak.
“Takon Jon!” ujug-ujug Kapér nyuwara.
“Iya Pér.”
“Bisané genderwo duwé karep péngin dadi bojoné Komar, pimén?”
“Jaré salah siji para normal sing tak jaluki pendapaté. Moniné, makhluk genderwo ya nduwéni nafsu birahi ora béda menungsa. Sedeng menungsa bisa ditemoni karo bangsa alus, jaré para normalé, ning waktu samana ‘temperatur’ antara menungsa karo bangsa alus, pas lagi klop! Ketambahan genderwo kuwé duwé dendam maring Komar. Akhiré, bojoné Komar didalah nang pang witwitan.”
“Trus njaluk dikawin Komar ya Jon?” sambung omongané Kapér.
“Yaul!”
Wkwkwkwk…. Jakwir-jakwiré Jon Dapuk pada nyekakak. (@)
—–
Lanang Setiawan, Seniman dan Penulis Novel.
Discussion about this post