BREBES – Masa jabatané Bupati Brebes Idza Priyanti lan Wakil Bupati Narjo resmi pan rampung dina Ahad 4 Desember 2022. Bupati lan kluwargané wis pada boyongan seka Pendopo Kanjengan maring umah pribadiné nang Jalan MT. Haryono Saditan RT 03 RW 04 Brebes, dina Jemuah (2/12/2022).
Bupati Idza lan bojoné, Warsidin, karo anaké metu seka pendopo nggawa klasa lan bantal nggo simbolis prosési boyongan. Ibuné Idza Priyanti, Rohkayah lan kakangé, Ikmal Jaya uga mélu njujugna Idza seka pendopo nuju maring umah pribadiné.
Sadurungé boyongan, Bupati nglakokna ana pirang prosési. Neng antarané, pamitan lan ndonga bareng-bareng neng kamar Ki Jaka Poleng. Saliyané kuwé, Bupati lan kluwargané uga di adzan lan qomat sadurungé ninggalna Pendopo Kanjengan.
Bupati bareng karo kluwargané mlaku seka Pendopo Kanjengan maring umah pribadiné. Ana pirang pejabat neng lingkungan Pemkab Brebes mélu njujugna Idza wayah boyongan.
“Selama sepuluh taun nyong njabat dadi Bupati, mesthi ana luputé maring masarakat. Mulané nyong lan kluwarga njaluk pangampura sing segedhé-gedhéné,” jaré Idza.
Idza ngarepna marinf pelaksana jabatan (Pj) Bupati Brebes bisa nglanjutna program sing wis jalan. Termasuk nggo ndorong ngentasna kemiskinan ékstrem. Karo ningkatna Indéks Pembangunan Manusia (IPM).
“Mesthiné ésih akéh PR sing nyong durung rampungna, terutama kemiskinan ekstrem. Nyong ngarepna Pj Bupati bisa ndorong program nggo ngentasna kemiskinan ékstrem,” jelasé.
Wektu boyongan, Bupati bareng karo kluwargané mlaku maring umahé seadoh sekitar 1,5 kilométer karo dikancani grimis. Seanjogé nang umah pribadiné, Bupati lan kluwargané disambut daning warga masarakat sing wis pada ngenténi.
*Wakil Bupati Brebes Narjo boyongan numpak grobag*
Sementara kuwé, Wakil Bupati Brebes Narjo karo kluwargané boyongan seka umah dinasé nang Jalan Cendana No 1 Kelurahan Brebes, Kecamatan Brebes, dina Jemuah (2/12/2022).
Bareng karo bojoné, Narjo numpak grobag nggo ninggalna umah dinas sing dipanggoni dhéwéké selama sa dekade maring umahé sing ana nang Désa Sutamaja, Kecamatan Kersana.
Éwuan warga masarakat katon wis pada kumpul nang umah dinas wakil bupati sajegé jam setengah rolas awan.
Wakil Bupati Brebes Narjo ngucapna maturnuwun maring kabéh masarakat Brebes sing wis awéh kepercayaan maring dhéwéké nggo mimpin Brebes dadi wakil bupati.
“Yén selama nyong mimpin Brebes bareng karo Ibu Bupati ana luputé, tulung diampura,” jaré Narjo.
Wektu boyongan, Narjo bareng karo bojoné numpak grobag sing dibopong daning masarakat. Molai seka umah dinas maring alun-alun Brebes.
Sekda Brebes Djoko Gunawan ngomong, senajan gari rong dina maning, nganti saiki durung ana rékoméndasi sosok sing pan dadi Pj. Bupati Brebes.
“Nyong selaku sing dituakna neng birokrasi kiyé, pan maksimalna pelayanan maring masarakat,” jaré Djoko Gunawan.
Dingerténi, masa jabatané Bupati Idza Priyanti lan Wakilé, Narjo pan rampung neng tanggal 4 Desember ngésuk. Pemimpin daérah kiyé wis njabat selama rong périodé utawa selama 10 taun. Périodé pertama neng 2012-2017 lan périodé keloro neng 2017-2022.
Discussion about this post