BREBES – Ana-ana baé polahé Harto (42), wong sing asalé seka Kabupatén Subang, Jawa Barat kiyé. Dhéwéké ndéyan lagi kepéngin ilon-ilon aksiné tokoh sing nang pilém laga ‘Robin Hood’, sing nggarong lan mbagi-mbagikna hasilé maring wong mlarat utawa kurang mampu. Senajan kaya kuwé, tindakan sing dilakoni daning Harto kuwé, salah gedhé lan nglanggar hukum.
Harto ya akhiré dicekel Tim Résmob Satréskrim Polrés Brebes gara-gara nyolong karo modus bisa nggandakna duwit. Totalé tekan Rp 200 juta seka umahé Kepala Desa Tegalglagah Kecamatan Bulakamba, sing arané Wahyono.
Pelaku, jaréné, dicekel tim Résmob Satréskrim Polrés Brebes nang wilayah Kabupatén Subang, Jawa Barat, nang tanggal 20 Agustus 2020 wingi. Harto sing sadina-dina terkenal dadi wong pinter kiyé ngaku, duwit hasil colongané dibagi-bagikna maring wong-wong telantar sing ditemoni daning dhéwéké nang endi baé.
“Saliyané dibagikna, pelaku uga nggunakna duwit kuwé nggo kebutuhan sadina-dina. Saliyané nangkep pelaku, dhéwék uga nyita keris siji, jaket lan tas samping nggo barang bukti,” omongé Kepala Unit I Satréskrim Polrés Brebes, Aiptu Titok Ambar Pramono, dina Rebo, 26 Agustus 2020.
Titok nyebut, modusé yakuwé pelaku ngaku bisa nggandakna duwit nang mesin ATM. Tapi, syarat ebén bisa nggandakna duwit korban kudu nyetorna duwit maring pelaku.
“Soalé kegiur karo iming-iming pelaku, korban ya nyerahna duwité segedhé Rp 200 juta. Daning pelaku dijanjikna pan dilipatgandakna dadi Rp 2 Milliar,” jelasé.
Sawisé nyerahna duwité maring pelaku, korban latané diejak maring ATM nggo apén-apéné pan nyedot duwit.
“Dadi keris ndéké pelaku, dienggo nggo luwih ngandel nglabuni korban angger pelaku bisa nggandakna karo cara nyedot duwit nang mesin ATM. Mauné sempet bisa, tapi pelaku mlayu sawisé olih duwit seka korban nang aksi saterusé,” omongé.
Pelaku, dhéwéké nglanjutna, mlayu ninggalna korban wayah ana nang lokasi ATM sing ana nang wilayah Kecamatan Bulakamba. “Sadurungé mlayu, maring korban pelaku mojar pan nyebar kembang pitung rupa nang sekitar ATM. Nang wayah korban lagi nglenger, pelaku latane mlayu,” jelasé.
Gara-gara perbuatané kuwé, pelaku dijerat karo Pasal 362 KUHP karo anceman ukumané 5 taun penjara.
Sementara pelaku Harto ngaku, angger hasil duwit colongané kuwé ora dienggo nggo kebutuhané dhéwék tok. Tapi, akehé malah dibagi-bagikna maring wong mlarat sing ditemoni daning dhéwéké nang endi baé.
“Duwit hasil nyolongé nyong bagi-bagikna maring warga kurang mampu. Nyong jukut saparo nggo keperluan pribadi,” ngakuné pelaku nang adepané petugas. (*)
Disunting Daning: Irsyam Faiz
Discussion about this post