TEGAL — Muhammad Zubair, bayi sing umuré limalas wulan seka Indramayu wis nglakoni pendakian utawa manjat Gunung Slamet via Basecamp Permadi Guci, Kabupatén Tegal. Dhéwéké mélu manjat nang gunung paling dhuwur nang Jawa Tengah kuwé bareng karo kluwargané lagi dina Sabtu-Minggu (22-23/1/2022).
Zubair yakuwé anak bontot seka telu bersaudara. Jaré bapané, Khaerul Anwar (32), Zubair wis ping pindo manjat gunung.
Jaré Ade, aran akrabé Khaerul, anaké aktif nemen pas mélu manjat gunung lan ora gelem meneng. Pas mudun ya, Zubair ésih bisa dolanan nang sakubengan homestay.
“Pas nang jalur pendakian, Zubair sempet kepéngin jalan lan pas lagi jalan ping kopang-kaping keplését. Digéndong ya ora gelem,” tuturé Ade maring PanturaPost, dina Minggu bengi (23/1/2022).
Jaréné, mauné, dhéwéké duwé rencana manjat gunung Slamet metung Permadi Guci bareng karo batir-batiré. Tapi pas kuwé bojoné pan mélu manjat. Mugané, otomatis anak-anaké mélu manjat gunung. Termasuk anak bontoté sing mbéké umur limalas wulan.
Sadurungé manjat gunung Slamet, Zubair wis tau manjat gunung Prau pas taun baru wingi.
“Sadurungé seneng camping-camping baé karo kluwarga. Tapi sawisé manjat gunung pertama nang Prau, nyong wis yakin Zubair bisa manjat gunung Slamet. Angger nyong dhéwék gemiyéné seneng manjat gunung sedengé angger bojoné ora seneng manjat gunung,” terangé.
Pas lagi perjalanan manjat Gunung Slamet, jaré Ade, Zubair kuwé ora réwél, malah seneng. Pas wayah bengi, tepaté nang pos 4, Zubair kuwat lan ora katisen.
“Ndéyan merga ana emaké dadi Zubair kuwat lan tahan atis. Padahal wayah pendakian kena udan. Tapi sing ora kuwat kuwé malah bojoné nyong wayah pendakian,” terangé.
Ade ngomong, dhéwéké molai manjat dina Saptu ésuk jam pitu. Anjog nang pos 4 jam setengah papat soré. Pas kuwé Zubair ora bisa manjat pucuk soalé ana aturan seka basecamp ngenani pendakian nang umur anak-anak.
“Dadi zubair mung bisa manjat gunung Slamet anjog pos 4,” tegasé.
Sementara kuwé, salah siji anggota basecamp pendakian Gunung Slamet metung Permadi Guci Sofyan ngomong, pendakian nang usia dini sabeneré diolihi. Tapi, kudu ana pengawasan seka wong tuwa sing jelasé wis pengalaman.
“Saliyané kuwé persiapan kudu wis mateng lan dipastikna anak kondisiné séhat uga mampu nggo diejak manjat,” jaréné.
Wayah pendakian, jaréné, disarana nggawa porter/guide setempat. Senajan saben akhir minggu pihak basecamp uga nugasna rong personél nggo jaga-jaga ngileng nang pos 4.
“Di samping kuwé, pihak basecamp uga nyarana pendakian nggo anak-anak mung anjog pos 4 tok,” pungkasé. (*)
Discussion about this post