Kasus Corona nang Tegal Manjat, Pemkot Dikongkon Nglakoni Karantina Wilayah Tingkat RT/RW

TEGAL – Pemréntah Kota (Pemkot) Tegal dikongkon nglakoni karantina wilayah skala cilik neng tingkat RT/RW. Langkah kiyé perlu dilakoni merga kasus COVID-19 nang Kota Tegal manjat terus.

Ketua Ikatan Dokter Indonesia (IDI) Kota Tegal dr. Said Baraba ngomong, karantina wilayah tingkat RT/RW pan luwih éféktif dibandingna karo nglakoni maning Pembatasan Sosial Berskala Besar (PSBB).

“Kota Tegal saiki zona abang. Saiki nyebaré COVID-19 wis dudu antar kota, tapi penyebaran lokal. Nggo-padhan pan karantina bisa tingkat RT/RW nggo nglindungi warga dhéwék-dhéwék,” omongé Said, anyar-anyar kiyé.

Jare dhéwéké, tingkat nyebaré COVID-19 nang Kota Tegal kedadén wis méh rata nang saben wilayah. Kota Tegal sing strategis nggawé transmisi penularan antar daérah bisa mlaku luwih cepet.

Baca Juga

Sawisé Kena Banjir, Warga Wotgalih Tegal pada Kerigan Nggawé Tanggul Kali

16 Januari 2021

Odong-odong nang Brebes Sing Ngompréng nang Gili Gedhé Pan Ditertibna Dishub

16 Januari 2021

Pageblug Nggawé Bakul-bakul nang Kota pada Bangkrut, Pindah Maring Desa

16 Januari 2021

Dalan Pantura Tegal Keleban Banjir, Kendaraan sing Liwat pada Kangélan

15 Januari 2021

“Ora perlu karantina tingkat kota, soalé percuma, wis nyebar rata nang Kota Tegal. Pisan maning angger saiki ora perlu PSBB tingkat kota tapi luwih apik tingkat RT utawaha RW,” tambahé.

Nurut Said, warga perlu terus diédukasi ngenani protokol pencegahan COVID-19. Pasalé, ana anggepan sing kesliru neng tengahéng masarakat ngenani new normal utawa adaptasi kebiasaan anyar. Hasilé, kasus nularé COVID-19 nang Kota Tegal ésih terus kedadén malah njengat. Salah sijiné soalé akéh nyiptakna rumbengan-rumbengan ora karo protokol COVID-19.

“Masarakat dhéwék ndéyan salah ngartikna new normal sing dianggepé wis normal mugané bebas. Padahal new normal kuwé siji kebiasaan anyar umpamané disit ora nganggo masker saiki nganggo,” jaréné.

Jare dhéwéké, sajegé awal apa sing wis dilakoni Pemkot Tegal nggo ngatasi COVID-19 wis apik nemen. Molai karo lokal lockdown lan PSBB sing nggawé Kota Tegal sempet zona ijo.

“Lan saiki wayah kasus njengat, pan mbuka maning tempat karantina nggo isolasi mandiri kaya nang Rusunawa kiyé wis pas,” pungkasé.

Sementara kuwé, ngacu data corona.tegalkota.go.id, dina Jemuah (20/11/2020) jam 14.45 WIB, total ana 930 kasus positif COVID-19 warga Kota Tegal. Rinciané 37 dirawat, 344 isolasi mandiri, 507 mari, lan 42 ninggal. (*)