BREBES – Warga Desa Pakijangan Kecamatan Bulakamba, Kabupaten Brebes, pada heboh wektu lagi mergoki wong lanang sing ora dikenal ménék pager umahé warga, dina Senén (28/8/2023).
Malah aksi wong lanang sing umuré 30-an kuwé kerekam kamera CCTV. Video CCTV kuwé langsung viral neng medsos lan akéh netizen sing pada nanggapi.
Wong lanang kuwé langsung diamana daning warga lan digawa maring Mapolsek Bulakamba.
Kapolres Brebes diwakili Kapolsek Bulakamba Iptu Ibnu Setiyadi ngiyakna ana kejadian wong lanang sing ora dikenal dicekel lagi dina Senén (28/8) ésuk wayah pan subuh.
Waktu kuwé, ana pirang warga Desa Pakijangan mergoki wong lanang ésih neng njero teras umahé warga. Padahal, kondisi gerbang lawang umah kuwé ésih kekunci.
“Seka hasil pemeriksaan, terduga pelaku termasuk Orang dengan Gangguan Jiwa. Soalé, saliyané laporan seka korban, barang bukti sing disita mung kutangé wong wadhon tok siji,” ungkapé.
Nggo tuna materiil cilik nemen, jaréné, kurang seka Rp 2,5 juta. Termasuk, keterangan seka pihak kluwarga wong lanang sing diamana pancén nduwéni riwayat ODGJ.
Latané penanganan perkara kuwé ora bisa diproses hukum lewih lanjut. Malah, wong lanang sing diamana kuwé kondisiné sehat lan wis dijemput daning pihak kluwarga bareng karo motor sing ditumpaki.
Sementara kuwé, Kepala Desa Pakijangan Adi Safrudin ngomong, informasi seka warga RT 2/1 pancén ngamana wong lanang sing umuré 30-an.
Indikasiné, wong lanang kuwé warga Desa Luwunggede sing mlebu kategori ODGJ. Soalé, sadurungé ménék pager témbok warga sing arané Sudrajat, 57. Wong lanang kuwé tak numpak motor lan diparkir pas neng samping umah warga.
“Soalé ndilalah aksiné (ménék pager) konangan warga, lan posisiné neng teras, akhiré warga pada inisiatif nyerahna wong lanang kuwé maring Mapolsek. Jebulané, ana riwayat ODGJ lan barang bukti mung kutang wong wadhon dadiné proses hukum ora bisa lanjut,” pungkasé. (*)
Discussion about this post