BREBES – Salah siji bangunan sing ana nang Sekolah Dasar Luar Biasa (SDLB) nang Kabupatén Brebes, sing ana nang dlanggung Yos Sudarso Brebes, sing lagi di rehab ujug-ujug ruwag, dina Rebo (9/9/2020).
Bangunan sing lagi diréhab lan ruwag kuwé yakuwé ruang guru lan ruang kepala sekola. Ruwag nang bagian kerangka sekalian plaponé.
Untung laka korban jiwa nang kedadénan kuwé. Padahal wayah kedadenan, ana pirang-pirang tukang ésih pada kerja nang lokasi bangunan kuwé.
Informasi sing berhasil dikumpulna, bagian plapon bangunan kerangka baja ringan lan plapon ruwag sekitar jam wolu ésuk. Dinyana merga konstruksi bangunan suwé ora kuwat nahan beban plapon. Mugané bagian kuda-kuda sing nyangga ruwag disusul bagian plaponé.
Bangunan sing ruwag kuwé lagi jeronéng proses rehab sanilé Rp 148 juta karo sumber anggaran seka Dana Alokasi Khusus (DAK) APBN taun 2020, lewat Dinas Pendidikan Provinsi Jawa Tengah.
“Plapon bangunan kiyé ruwag mau ésuk, sekitar jam wolu. Pas kuwé, nyong lan guru-guru wis ana nang sekola lan ujug-ujug krungu suwara rosa bruk. Pas kuwé pancén ana tukang sing nyambut gawé, tapiné syukur wong-wong kuwe bisa inggat utawa nylametna awaké dhéwék. Dadi laka korban jiwa lan kabéh aman,” omongé Kepala Sekola SDLB Brebes Stephanus Widyatmoko nang lokasi kedadénan.
Dhéwéké nambahi, bangunan sing ruwag kuwe jeronéng proses rehab lan kondisiné wis 70 persen penggarapan. Jeronéng penggarapan kuwé, sekolané olih bantuan rehab énténg. Yakuwé, rupané dandanan plapon sa ruang lokal sing digunakna nggo ruang guru lan kepala sekola.
“Pancen pegawéan rehab kiyé wis dilakoni sekitar rong minggu wingi. Bangunan kiyé awit ngadeg pancen durung pernah didandani. Ndeyan merga bangunan suwé ora kuwat nahan beban plapon sing anyar mugane ruwag. Deleng baé nang bagian kuda-kuda plapon uga ruwag kabeh,” jelasé.
Dhéwéké ngomong, bangunan sing ruwag kuwé ésih dadi tanggung jawab rekanan pelaksana. Kuwé soale ésih jeronéng proses penggarapan. “Sing jelas durung ana serah trima, angger nganggo cara teknis dhéwék ora ngarti persis. Tapi, sing jelas dhéwék nrima bantuan rehab seka DAK sanilé Rp 148 juta lan pelaksanané seka Semarang,” ungkapé.
Sementara kuwé, Kristanto, sing dadi rekanan pelaksana proyek pembangunan kuwé ngomong, nganggo dasar cek lokasi, plapon bangunan kuwé ruwag soalé bagian ring slup plapon seka bangunan suwe ora kuwat. Apamaning, wayah dicek jebulé wesi cor beton sing dienggo cilik-cilik lan kemungkinan bangunan suwé.
“Monggo diileng nang lokasi, angger nurut pemeriksaan awal nyong mau nang lapangan, kiyé dinyana merga bagian ring seka bangunan lawas sing nggo naleni plapon ora kuwat nahan kerangka baja ringan lan gendeng,” pungkasé. (*)
Disunting Daning: Irsyam Faiz
Discussion about this post