TEGAL — Pemréntah Kota (Pemkot) Tegal ngrencanakna molai tanggal 1 Fébruari 2021 kabéh bioskop nang Kota Bahari olih dibuka maning. Kaya dingerténi, ke telu bioskop yakuwé Gajah Mada Cinema, CGV Cinemas Transmart Tegal lan Cinepolis Pacific Mal sempet tutup sajegé pageblug Corona teka.
Wali Kota Tegal Dédy Yon Supriyono ngomong, senajan kaya kuwé, masing-masing bioskop kudu nerapna protokol kesehatan sing ketat.
“Daya tampung penonton maksimal diisi séket persén,” omongé lubar nekani Penandatanganan bersama Perjanjian Kinerja (PK) lan Penetapan Agen Perubahan Pemkot Tegal Taun 2021 nang Pendapa Ki Gedé Sebayu, dina Rebo (20/1/2021).
Dédy ngomong, pihaké ora pan awéh toléransi angger pihak bioskop nrima penonton luwih seka séket persén daya tampung. Saliyané kuwé, pihak pengelola uga mbuka tempat pesen tiket metung sistem onlén, nyiapna petugas, nyiapna hand sanitizer lan nang lawang manjing ana petugas ngganggo termo gun nggo ngecék suhu awaké penonton.
Baca Juga
“Nang Tegal dongé wis buka seka awal Januari, tapi merga nang daérah sing liya ésih ana sing nglakoni PSBB bareng-bareng, akhiré nang Kota Tegal bioskop pan buka nang tanggal 1 Fébruari 2021,” jaré Dédy Yon.
Dédy ngungkapna, bioskop nang DKI Jakarta wis dibuka sajegé wulan Novémber 2019. Bioskop nang Kota Tegal awalé dibuka maning nang tanggal 1 Januari 2020. Tapi dhéwéké durung bisa mékena lampu ijo soalé nang pirang-pirang daérah ésih nerapna PSBB bareng-bareng.
Dhéwéké ngarep-arep, tanggal 1 Februari 2021 managemen seka ke telu bioskop kuwé wis nglakoni persiapan sing mateng nggo pelaksanaan protokol kesehatan. Sementara simulasi pan digelar sadurungé nganggo cara resmi bioskop dibuka.
“Akhir wulan Januari dhéwék pan lakoni simulasi luwih-luwih disit sadurungé sinema kiyé dibuka,” jelasé Wali Kota. (*)
Disunting Daning: Irsyam Faiz
Discussion about this post