TEGAL – Puluhan mahasiswa Universitas Pancasakti (UPS) Tegal pada nuntut biaya kuliahé dimuduna selawase pageblug utawa pandemi COVID-19. Mahasiswa kuwé pada demo utawa nggelar aksi unjuk rasa nang kampusé, dina Senén (31/8/2020).
Perwakilan seka mahasiswa, Andika Fébri nang orasiné nyampékna, wayah mahasiswa sinau daring dongé ana keringanan biaya kuliah. Apamaning, fasilitas perkuliahan ora sapenuhé dienggo daning mahasiswa.
“Wayah keadaan angél kaya kiyé, mahasiswa malah dibebanna nggo tetep mbayarna biaya kuliahé kuwé penuh. Padahal pembelajaran dilakoni nganggo cara daring, dadiné fasilitas perkuliahan uga ora dienggo optimal,” jaréné.
Nang sisi liya, jaré Andika, merebaké pandemi COVID-19 nggawé terpuruké kabéh sendi urip. Ora terkecuali nang sektor ekonomi.
“Durung maning Indonesia diadhepna nang resesi sing pan nambahi beban negara,” omongé.
Disampekna dhéwéké, mahasiswa uga wis kebebani karo kuota internet sing kudu ditanggung nggo bisa meloni proses perkuliahan.
Belih satitik, ekonominé wong-wong tuwa uga melu ngrasakna dampak pandemi. Tapi, mahasiswa ora satitik ya olih simpati seka pihak kampus.
“Nggo kuwé dhéwék nuntut pihak kampus nggo ngénténgna biaya. Baik kuwé registrasi lan njamin laka mahasiswa sing cuti lawasé pandemi,” pungkasé.
Rektor UPS Tegal Fakhrudin ngaku pan nampung aspirasiné mahasiswa. Pihaké pan ngrembukna persoalan kuwé bareng karo jajaran rektorat, dekanat, lan yayasan UPS.
Jaréné, ana mekanismé sing kudu ditempuh sadurungé putusan ditokna. “Aspirasi uga kudu realitas. Dhéwék tetep merhatikna aspirasi mahasiswa sing pan disampékna maring Yayasan,” omongé maring wartawan.
Pihaké pan ngundang perwakilan seka mahasiswa nggo nglakoni audiénsi nang dina Kemis (3/9/2020). “Soalé kebijakan sing ditokna dudu mung nang rektorat tok, tapi uga dibahas bareng karo yayasan,” pungkasé.
Durung marem karo jawabané rektor, mahasiswa nglanjutna maning aksiné. Dina kiye, mahasiswa pada nglakoni aksi nang ngarepe kantor yayasan. Aksi surung antara mahasiswa lan petugas keamanan sempet marnani mlakuné aksi. (*)
Disunting Daning: Irsyam Faiz
Discussion about this post