Melas Nemen Nasibé Mbah Muadah, Urip Dhéwékan, Arané Dicoret seka Bantuan Corona
Nang umur tuwané, wong Pasarbatang, Brebes kuwé ngandelna welas asih seka tangga-tanggané.
BREBES – Melas nemen nasibé mbah Muadah sing umuré pitung puluh taun kiyé. Embah-embah sing asalé seka Kelurahan Pasarbatang Kecamatan Brebes mung pasrah wayah dhéwéké belih olih maning bantuan sosial (Bansos) dampak pandemi COVID-19 utawa Corona.
Padahal, nang tahap pertama wulan April wingi, Mbah Muadah kuwé tau olih Bansos seka Pemkab Brebes segedhé Rp 200 éwu. Tapi, rong tahap pencairan bansos saterusé, arané dhéwéké belih muncul dadi penerima.
Baca Juga
“Mboten ngertos Mas. Bansos tahap pertama angsal, tahap ke loro lan ke telu mboten angsal,” tuturé nini Muadah nang umahé, dina Senen (2/11/2020).
Uripé nini Muadah rada nelangsa. Dhéwéké mung nduwéni penghasilan hasil panen seka wit sawo déké dhéwék. Yakuwé, Rp 800 éwu per taun.
Ironisé, nini Muadah uga belih kedaftar dadi penerima bantuan apabaé sadurungé seka pemrentah, mbuh kuwé tah program BPNT utawané PKH Lansia. Nang umur tuwané, dhéwéké ngandelna welas asih utawa wéinan bahan panganan seka tangga-tanggané.
Nanggepi hal kuwé, Lurah Pasarbatang Edi Kusuma ngomomg, ana pengurangan jumlah penerima bansos COVID-19 sing sumberé seka APBD Pemkab Brebes saben tahap pencairan.
“Seka usulané dhéwék pas kuwé, sekitaréng 1.800 penerima, sing arané muncul nang tahap awal 1300-an. Tahap loro susut dadi 1100-an. Latané tahap ke telu susut 25 penerima. Data penerima dhéwék trima seka Dinsos,” jaré Kusuma Edi.
Sementara kuwé, Plt Kepala Dinsos Brebes, Masfuri ngomong, ana pirang faktor penerima Bansos COVID-19 susut nang saben tahap pencairan. Pertama, penerima Bansos nang tahap pertama belih nglakoni verifikasi kekait nomer kartu Kepala Kluwarga. Keloro, penerima Bansos dingerténi uga penerima Bansos program pemrentah liyané.
“Saliyané nggunakna NIK, dhéwék verifikasi karo nomer KK penerima kuwé. Soalé, nang tahap awal, BPKP nemu ana penerima sing wis nrima Bansos sadurungé. Nggo ngecek kuwé dhéwék butuh no KK kuwé. Soalé dhéwék terus nglakoni dandanan data saben tahap pencairan Bansos,” ungkapé.
Masfuri ngungkapna, Brebes dhéwék nganggarna Rp33 miliar nggo Jaring Pengaman Sosial (JPS). Karo target, 55.400 KK bisa kebantu. Dhéwéké nyebut, seka target, ora kabehané olih JPS seka Pemkab Brebes.
Malah, sawisé dilakoni pemeriksaan daning pihaké, data penerima bantuan tahap pertama seka Bansos Kabupatén ana sing ganda soalé olih bantuan seka skema liyané.
“Sawisé dilakoni pemeriksaan, ana 44.929 KK sing olih bantuan. Lan kuwé uga ora kabehané nglakoni pencairan,” pungkasé. (*)
Disunting Daning: Irsyam Faiz
Discussion about this post