TEGAL — Melas nemen nasibé petani nang Désa Begawat, Kecamatan Bumijawa, Kabupatén Tegal sing arané Sariah (58) kiyé. Dhéwéké ninggal kurugan longsoran tebing sedhuwur satus méter wayah lagi ngemét waluh siyem nang kebon, dina Minggu (13/12).
Salah siji warga, Wasro (35) ngomong, peristiwa kuwé kedadén sekitar jam sanga ésuk wayah korban ngemét labu siam nang kebon perek tebing. Ujug-ujug tebing longsor lan nibani korban.
“Pas kuwé nyong uga ana nang kebon, ya ora adoh seka lokasi longsor. Mukur keboné nyong lan korban keletan kali. Pas kuwé nyong krungu ana suwara gemludug, lan wayah nyong nglinguk mana jebulé longsor,” jaréné.
Pas kuwé, dhéwéké weruh korban sempet usaha mlayu nylametna awaké dhéwék. Tapi soalé guguran material lemah tebing sing longsor cepet nemen, korban ya gagal nylametna awaké dhéwék lan akhiré kurugan longsor.
“Nyong sempet ndadak mlayu mono nggo nulung korban. Tapi nyong uga runtag akhiré nyong ora mana. Nyong latané njaluk tulung Pak Ruslim nggo njaluk bantuané warga,” ungkapé.
Sementara kuwé, salah siji relawan Banser Serba Guna (Bagana) Kecamatan Bumijawa, Ritno Prasetyo, ngomong, korban ninggal nang lokasi kedadénan. Korban ditemukna daning warga kurugan lemah karo posisi sikil nang ndhuwur lan kabéh awak kurugan material lemah.
“Iya bener, kaya kuwé nyong anjog maring lokasi korban wis ditemukna warga. Korban langsung diévakuasi lan digawa maring umah duka,” jaréné.
Jaré dhéwéké, kedadenan lemah longsor wis dilaporna maring pemréntah désa kononé, termasuk Puskesmas Bumijawa, Polsék Bumijawa lan PMI Kabupatén Tegal. Dhéwéké ngomong ari tebing sedhuwur kurang luwih satus méter kiyé longsor merga dampak seka curah udan sing dhuwur.
“Ya wilayah kiyé pancén rawan nemen longsor wayah mangsa rendheng. Nyong nglaruhi warga nggo luwih ngati-ati,” jelasé. (*)
Disunting Daning: Irsyam Faiz
Discussion about this post