BREBES — Klompotan garong minimarket ngaksi maning nang Kabupatén Brebes. Saiki, sasarané siji minimarket sing ana nang wilayah Désa Bulusari Kecamatan Bulakamba, dina Slasa (13/10/2020). Aksi kuwé pertama pisan dingerténi daning salah siji karyawan minimarket sing pan manjing kerja sekitar jam enem ésuk. Pas manjing, dhéwéké kaget ngarti kondisi nang njero pating modal-madul ora karuan.
Informasi sing berhasil dikumpulna panturapost, aksi kuwé dilakoni sekitar dina Slasa (13/10/2020). Klompotan garong manjing maring njero minimarket karo ngliwati bagian mburi karo njebol gendengé. Aksi pelaku lumayan rapi lan profesional. Garongé nganggo alat khusus nggo nglancarna aksiné, nang antarané mesin grenda, graji wesi lan ngaksiné cepet nemen.
“Pas kuwé, nyong pan mangkat kerja, lan teka nang minimarket sekitar jam enem ésuk. Sawisé mbuka ranté gembok lan manjing maring minimarket, nyong weruh étalasé rokok pating modal-madul. Rokok sing ditawakna juga wis kopong, nggari sisa pirang bungkus. Kondisi nang jero uga wis modal-madul,” jaré Sugeng Andriyani (20), karyawan minimarket.
Dhéwéké ya curiga. Latané, ngecék maring njero ruang sing pranti nggo ndokon brangkas. Bener baé, kondisi brangkas wis kebuka lan duwit sing kesimpen laka. Wayah ngecek nggon liyané, katon nang pirang titik nggon eternité wis jebol, termasuk eternit nang nggon kakus.
“Sawisé ngarti kiyé, nyong langsung nglapor maring pimpinan lan maring polisi,” jaréné.
Nemoni laporan seka masarakat, Tim Gabungan Résmob Satréskrim Polrés Brebes karo unit Réskrim Polsék Bulakamba ngluncur maring TKP.
“Dhéwék olih laporan dina Slasa ésuk mau sekitar jam pituan. Pelaku manjing karo cara ménék lan nggunting aub-aub, latané njebol aub-aub eternit. Sawisé manjing, pelaku langsung nyikat pirang-pirang barang bangsané rokok nang étalasé lan mbobol brangkas,” omongé Kanit Réskrim Polsék Bulakamba Ipda Widodo.
Dhéwéké nambahi, rombongan garong kuwé nggondhol duwit seakéh Rp 28 juta nang jero brangkas. Total tuna Rp 55 juta. “Pelaku nganggo gerenda karo graji wesi nggo mbodhol brangkas. Pelaku uga nggawa kotak receiver SCTV minimarket,” jaré dhéwéké.
Sawisé nglakoni aksiné, rombongan garong kuwé mlayu metung dalan sing padha karo menek lan ngliwati aub-aub ternit. “Dhéwék bareng karo tim gabungan wis nglakoni olah TKP, dhéwék ésih njeroni kasus kiyé luwih lanjut,” jelasé. (*)
Disunting Daning: Irsyam Faiz
Discussion about this post