TEGAL – Salah siji wong nang Désa Lebeteng, Kecamatan Tarub, Kabupatén Tegal, dadi korban penyerangan pas lagi solat nang Musala daning wong ora dikenal. Korban arané Ruminah, mbah-mbah sing umuré sawidak taun.
Mbah Ruminah dikepruk nggo kayu balok daning wong ora dikenal pas lagi solat sunah qobliyah subuh nang Musala Assodiqin, dina Senen (5/10). Merga kedadénan kuwé, korban ngalami luka suwek nang endas nggon mburi lan kudu dijait pitu.
Kasat Réskrim Polrés Tegal, AKP Heru Sanudi, dina Rebo (7/10) ngomong ari pihaké wis duwé titik terang kekait ketuduh pelaku penyerangan. Nganyi saiki, pihaké ésih nglakoni proses penyelidikan.
“Nggo pelaku dhéwék esih dhéwék jeroni. Ésih dhéwék kembangna maning. Nggo wong sing dhéwék duga, dhéwék curigani nglakoni kuwé wis ana, tapi dhéwék ésih njeroni maning. Njaluk pangapurané ora bisa dhéwék sampékna soalé kiyé ésih proses penyelidikan,” jaréné.
Kekait kedadénan kiyé, Heru njelasna ari korbané wong wadon sing lagi sembahyang dhéwékan nang Musala. Latané korban dikantem seka arah mburi daning wong sing ora dikenal.
“Kuwé korban lagi sholat dhéwékan. Soalé kiyé korban wadon, dhéwéké posisiné dhéwék ditutup langse lan sa wong maning lagi tadarusan. Latané seka saksi nyampékna ari dhéwéké krasa dikantem nang nggon endas mburi,” jaréné.
Jaré dhéwéké, sawisé korban diserang, korban fokus nang rasa lara sing dialami merga kena kanteman kuwé. Tapi latané, korban njaluk tulung karo marbot Musala sing pas kuwé lagi tadarusan. Tapi, wayah marbot kuwé luruh, pelaku wis mlayu.
“Sawisé dikantem korban nggludag. Latané dhéwéké fokus nang larané. Soalé dhéwéké njaluk tulung latané wong sing tadarusan mau luruh. Latané nulungi korban,” ungkapé.
Sementara kuwé, salah siji wong sing dadi korbané, Taspuri, ngomong ari wong sing ngantem wong nang Musala kuwé dinyana warga kononé. Tapi, dhéwéke krungu-krungu pelaku kuwé kentir utawa ora waras.
“Ya jare wong-wong sih sing nglakoni penyerangan kuwé wongé setrés utawa edan. Angger saiki wongé laka, soalé pas kedadenan Bu Ruminah, dhéwéké mlayu,” tuturé.
Pada baé kaya sing diomongna daning Kepala Désa Lebeteng, Sukasmo. Jaréné, wong sing dinyana ngantem kuwé pancen madan ora waras. Saiki, kasus kuwé lagi ditangani daning pihak kepolisian.
“Dhéwéké bener madan ora waras. Mukur nyong ora patia paham karo wongé, soalé dhéwéké manggoné nang pedukuhan. Saiki esih lagi digoleti daning pulisi,” jelasé. (*)
Discussion about this post