Nang Tol Tegal Ana Terios Nabrak Trek, Jaréné Ésih Kluwarga karo Ustad Yusuf Mansur

TEGAL — Kecelakaan kedadén nang ruas Tol Pejagan-Pemalang, Km 281+700 jalur Anglibatna kendaraan Daihatsu Terrios lan Trek, dina Rebo (19/1/2022) soré. Kedadénan kuwé ngakibatna sa wong penumpang kendaraan Daihatsu Terios ninggal dunya nang lokasi kedadénan.

Kepala Cabang Pejagan-Pemalang Toll Road (PPTR), Ian Dwinanto, wayah dikonfirmasi ngiyakna kedadénan kuwé. Korban sing ninggal yakuwé Mahmud Fauzi (57), salah siji staf pengajar nang Pondok Pesantren Tahfizh Daarul Qur’an (DaQu) sing diasuh daning Ustad Yusuf Mansur.

“Iya bener ana kecelakaan antara kendaraan Daihatsu Terrios karo trek. Korban ninggal ana sa wong. Lan informasiné kuwé ésih kluwarga ustad Yusuf Mansur,” jaréné.

Kedadénan awalé wayah kendaraan Daihatsu Terios karo Nomor Polisi B 1735 lan trek karo Nomor Polisi K 1434 LK mlayu seka arah kulon nuju maring mengétan. Seanjogé nang lokasi, Daihatsu Terrios pan ngindangi trek sing ana nang ngarepé. Tapi merga dinyana supiré ora ngantisipasi, akhiré nabrak bagian mburi trek.

Baca Juga

Gara-gara Ban Ngarepé Mbledug, Mobilio Nguling nang Tol Pejagan

16 Mei 2022

Bocah 16 Taun Dibacok Bégal Wayah Joging nang Fly Over Tol Kemukten Brebes

16 Mei 2022

“Sawisé kedadénan, posisi trek madep mengétan utawa posisi normal. Sedengé kendaraan Terrios madep mengidul,” ungkapé.

Nggo kendaraan Daihatsu Terrios dijalakna daning Abdulloh, warga Jalan Tegal Parang Selatan, 3 RT 7/4, Mampang Prapatan, Jakarta Selatan. Lan nggo kendaraan trek dijalakna daning Rian Kusrianto, warga Désa Terban RT 01, RW 05 Kecamatan Jekulo, Kudus. Kecelakaan kuwé uga nggawé sa wong luka berat lan sa wong luka ringan.

“Nggo jenazah digawa maring RSUD dr Soesilo Slawi. Lan nggo korban luka digawa maring RSUI Singkil Adiwerna. Nggo saiki, penanganan wis dhéwék wékena maring Satlantar Polres Tegal,” jaréné.

Nggo korban luka berat dingerténi arané Wahid (50) lan luka ringan Abdulloh (53). Ustad Yusuf Mansur lan rombongan teka nang RSUD dr Soesilo Slawi sekitar jam sewelas kurang seprapat bengi lan nglakoni sholat jenazah.

“Kiyé jenazah lagi disholatna daning Ustad Yusuf Mansur lan rombongan. Sedélat maning pan digawa maring Tangerang,” tuturé petugas pemulasaran jenazah RSUD dr Soesilo Slawi, Waras. (*)