LESUNÉ dunya usaha merga pageblug corona ora nggawé UMKM pengrajin aksesoris pengantén nang Kabupatén Tegal pedot pengarepan. Tapi pengrajin terus berkarya nggo nambahi stok wayah ana imbauan nang umah baé nang wayah pageblug. Lan, luruh trobosan wayah promosi produk nang media onlén.
Kaya sing dilakoni Ornate Handicraft, UMKM pengrajin aksesoris seka Désa Balapulang Wetan Kecamatan Balapulang Kabupatén Tegal.
“Wayah ana imbauan nang umah baé, ora olih nganakna aktivitas gedhé lan liyané, nyong nang umah nggawé stok barang aksesoris pengantén. Nang pas kuwé babar blas laka oderan utawa pesenan. Barang sing dhéwék gawé ora metu,” tuturé Arofatun Ni’mah, Owner Ornate Handicraft maring PanturaPost, dina Jemuah (26/11/2020).
Ni’mah ngakoni kondisi pageblug sempet nggawé kéder soalé laka pesenan. Tapi dhéwéké terus luruh peluang nggo mromosikna kerajinané. Kebeneran nang media sosial uga akéh éndorse sing mbuka postingan gratis.
“Mauné ora ngandel. Sawisé cacak kirim poto lan gambar maring éndorse terus, eh ora méné ya photoné diposting. Pas kuwe nyong cacak kirim poto lan gambar aksesoris sing nyong gawé maring salah siji artis kaya make up artis Bandung. Jebulé aksesoris nyong ditawakna nggo diposting artis kuwé,” ungkapé Ni’mah tanpa nyebut arané artis kuwé.
Seka postingan kuwé, Ni’mah nglanjutna, pesenan aksesoris pada teka. Malah pesenan teka seka luar kota. Termasuk seka luar Jawa. “Nyong ya kuwalahan wayah nggawé aksesoris. Akhiré nyong ngrekrut karyawan nang umah. Awalé nyong ngrekrut karyawan rong wong. Tapi jebulé ésih kuwalahan. Dadi nambah wong maning nggo njait karo masang payet,” ungkapé.
Sadurungé pageblug, Ni’mah bisa nrima 15 pesenan neng sawulané. Tapi sawisé wayah pageblug, mung 1 pesenan neng sawulané. Malah laka babar blas pesenan. Tapi, sawulan mburi-mburinan kiyé, sawisé aksesorisé dipromosikna, molai akéh pesenan.
“Malah neng sa wulan, ana 30 pesenan,” omongé Ni’mah karo raut rai bungah.
Wayah proses gawé produk aksesoris pengantén, neng 1 produk kuwé, ana sing kudu digarap sekitaré loro utawa telung dina. Uga ana sing bisa rampung neng sadina.
“Pesenan aksesoris pengantén kuwé akehé seka luar kota karo luar Jawa. Kaya kudung pengantén, mahar lan liyané, akehé pesenan metung media onlén kaya instragram,” ungkapé.
Ni’mah krasa seneng soalé pesenan tambah akéh. Luwih-luwih bisa bagi-bagi pegawéan karo tangga. Mugané tangga bisa olih penghasilan tambahan. (*)
Disunting Daning: Irsyam Faiz
Discussion about this post