BREBES — Polisi akhiré bisa ngréok rong pelaku sing njambrét nang gili gedhé Pantura Gajahmada Brebes, dina Minggu (24/1). Keloroné dicekel petugas sing pas kuwé lagi ngawal vaksin COVID-19 nang gudang farmasi ndéké Dinkes Brebes. Pelaku yakuwé warga Kecamatan Bulakamba, yakuwé Dulmajid lan Slamet. Dhéwéké dicekel ora let suwé sawisé njambrét HaPé nang dalan.
Pas kuwé, ke loro pelaku lan korban bareng-bareng ndayak trek seka Kota Tegal karo tujuan maring Brebes. Jaréné Ihsan Munaim (14), warga Ciledug, Kabupaten Cirebon, dhéwéké karo rombongan mbené baé dolanan nang Pantai Alam Indah (PAI) Tegal.
Wayah balik, dhéwéké karo rombongan ndayak trek bareng karo pelaku. Nang dalan, jaré Ihsan, salah siji pelaku nyilih HaPé-né korban. “Ujug-ujug pelaku mojar lan nyamperi korban, angger HaPé-né nggo nyong baé, terus nyong jawab aja kuwé nggo sekola. Terus dhéwéké (pelaku) mojar angger belih olih mengko nyong tunjleb kowen,” omongé Ihsan nirokna omongané pelaku.
Sawisé ngrebut HaPé ndéké korban, latané pelakuné pada minggat. Barang kaya kuwé, korban ngorong-ngorong njaluk tulung. Kebeneran, belih adoh seka lokasi kedadénan, ana anggota polisi sing lagi ngamankna vaksin sing mbené teka seka Semarang. Lan anggota polisi kuwé akhiré bisa ngamankna ke loro pelaku.
Baca Juga
Wayah dijaluki keterangan daning petugas, salah siji pelaku Dulmajid ngaku mbené pertama pisan nglakoni aksi kuwé. Dhéwéké ngrebut karo bocah dalanan sing bareng sa trek (ndayak). “Dudu jambrét, malak. Biasalah pak bocah dalanan,” ngakuné Dulmajid.
Sementara kuwé, Kanit Dalmas Polrés Brebes Ipda Joko Widiyanto ngomong, saiki ke loro pelaku wis diamankna pihak kepolisian lan digawa maring Polsék Brebes. Sadurungé dicekel, ke loro pelaku sempet minggat tapi akhiré bisa diamankna belih adoh seka lokasi kedadénan.
“Awalé siji pelaku bisa diamankna. Ora let suwé, merga anggotané sigap, siji pelaku liyané bisa diamankna maning. Lan keloroné saiki wis diamankna nang Polsék Brebes,” omongé Joko Widiyanto. (*)
Discussion about this post