TEGAL– Aksi pirang petugas Satuan Polisi Pamong Praja (Satpol PP) ribut karo wong dagang sing mangkal nang kawasan Alun-alun Kota Tegal, Jawa Tengah heboh nang fesbuk. Salah sijiné neng njero vidio sing dibagikna daning akun fesbuk Eka Pribadi, dina Jemuah (23/10/2020).
Neng njero vidio sing dawané 46 detik kuwé katon ana pirang anggota Satpol PP lagi ngamanna emak-emak sing lagi dagang. Suwara sruwangan wong nangis lan rusuh katon krungu. Daning sing ngaplod vidio, disogi keterangan, “Kepibén jaré rika, bandingna karo ditutupé tempat karoké. Dongé bedané apa, bakul kaki limahan karo bakul karoké, wong pada baé dodolé nang pinggir dalan.”
Informasi sing ditampa Panturapost.com, vidio kuwé kedadén nang dina Jemuah (16/10/2020) wingi. Tepaté wayah anggota Sapol PP nertibna wong dagang sing mangkal nang kawasan Alun-alun sing pancén dipenging dodolan soalé lagi ana revitalisasi.
Kasat Réskrim Polrés Tegal Kota AKP Syuaib Abdullah ngomong, pihaké ngaku wis weruh vidio sing viral kuwé. Malah ana pirang anggota Satpol PP pirang dina sawisé kedadénan sempet wadul maring polisi.
Baca Juga
“Pirang anggota Satpol PP pada wadul merga perkiraan disiram bengsin daning salah siji wong dagang. Dadi mung wadulan dudu laporan polisi resmi,” omongé Syuaib, wayah dibell, dina Saptu (24/10/2020).
Merga dasar wadulan kuwé, pihaké latané langsung nylidiki. Hasil penyelidikan awal polisi, wong dagang sing dingerténi arané Yuli malah ora dikropok Satpol PP. Pas kuwé, Yuli ora gelem lapak dagangané diamanna daning Satpol PP lan milih nyiramna bengsin maring awaké sing uga maring awaké pirang anggota Satpol PP.
“Dadi wong dagang kiyé sadurungé nyiram awaké dhéwék karo bensin, latané maring Satpol PP. Lan ngomong hayuh mati bareng,” jaré Syuaib.
Nggo ngadohi hal sing ora dikepéngini, petugas Satpol PP usaha ngrebut korek mancis seka tangané Yuli sing pan ngobong awaké dhéwék. “Pas kuwé, Satpol PP usaha ngrebut korek mancis seka Yuli sing pan ngobong awaké dhewek. Soalé angger diurubna bisa kekobong kabéh. Ora mung Satpol PP, tapi uga dhéwéké,” omongé.
Merga kuwé, Syuaib negasna, diomongna Satpol PP ngropok wong dagang kaya neng njero vidio viral kuwé ora bener. “Pas dhéwéké (Yuli) pan ngobong awaké dhéwék nganggo korek mancis. Satpol PP ngalang-ngalangi sing kesané nang vidio ngropok,” jaréné.
Pihak kepolisian, jaré Syuaib duwé rencana ngundang Yuli nggo dijaluki keterangan. “Mengko pan dhéwék mediasi. Ébén gagiyan pragat masalahé. Dadi lamon bisa rampungna kekeluargaan baé,” imbuhé. (*)
Discussion about this post