BREBES – Arus lalu lintas nang wilayah kota Kecamatan Bumiayu, Kabupatén Brebes, dina Senen (10/8/2020) awan katon pating semrawud daning kendaraan. Wong dagang lan kendaraan sing mangan dalan dinyana dadi penyebabé.
Semrawudé kuwe kedadén molai seka ngarepéng Pasar Induk Bumiayu-Kalierang-Jatisawit. Nganti ana sa kilometer dhéwék.
Jaré Kepala Dishub Kabupatén Brebes, Johari, akéh warga sing ngengluhna semrawudé lalu lintas nang Bumiayu, utamané nang lingkungan pasar. Jaréné kuwé merga anané ramé-ramé nang sekitaréng pasar. Sementara saiki langka lokasi sing nggo parkir dadiné kendaraan pada parkir nang pinggir dalan.
“Penyebabé ya ana ramé-ramé pasar tapi tempat parkiré langka, mugane nggunakna pinggir dalan nggo parkir,” jaréné.
Dhéwéké ngomong, ana pirang titik-titik ramé-ramé sing ana nang dalan Diponegoro lan dalan mburiné Pasar Induk Bumiayu utawa ngarepé kantor PLN. “Titik macet nang dalan Diponegoro lan mburiné Pasar Bumiayu,” omongé dhéwéké.
Nggo ngatasi semrawudé dalan kuwé, Dishub pan gagiyan nertibna parkiran toli wong dagang bareng karo Dinas kekait. Wong dagang sing pada nempati pinggir dalan pan ditertibna lan parkiré uga pan ditata.
“Wong dagang pan dhéwék surung ebén ora manggon nang pinggir dalan lan parkiré dhéwék tata,” jaréné.
Johari ngakoni, ora gampang nggo nata lan ngilangna semrawudé nang dalan kana. Soalé, kiyé nyangkut kepentingan urip lan ékonominé wong akéh.
“Ngilangna babar blas semrawudé ora mungkin, tapi dhéwék tetep upayakna nggo penataan. Dhéwék pan lakokna penertiban nang sekitaréng pasar lan titik-titik sing raméné,” tuturé Johari. (*)
Disunting Daning: Irsyam Faiz
Discussion about this post