SLAWI – Pemrentah Kabupatén Tegal ngluncurna aplikasi monitoring penerapan protokol kesehatan (MUTAN) karo pembayaran non tunai nggo Pedagang Kaki Lima (PKL) lan pelaku usaha, sing tempaté neng Alun-alun Hanggawana Slawi, dina Minggu (8/11/2020). Upaya kiyé nggo nyegah nyebaré virus Corona.
Sistem aplikasi kiyé, mengkoné masarakat bisa melu ndeleng kepatuhan PKL karo penerapan protokol kesehatan, pas mindai QR Code sing ketempel nang grobogané PKL nganggo smartphone. “Masarakat bisa méin peniléan tingkat kepatuhan PKL neng aplikasi. Sing diterusna dadi laporan maring Satpl PP,” tuturé Kepala Dinas Dagkop dan UKM Suspriyanti.
Jare dhéwéké, pihaké wis nginput data seakéh 770 PKL. Rinciané PKL Alun-alun Slawi 603 wong, PKL Jl. Kagok 52 wong, PKL Rumdin Bupati 39 wong, PKL Monumen GBN 23 wong, PKL RSUD dr. Soeselo 17 wong lan PKL Modern 36 Wong.
“Nang aplikasi MUTAN, masarakat bisa mékena peniléan maring wong dagang, apa penerapan Prokes nang tempat usahané, kurang, cukup utawa wis apik. Karo score bintang 1, 2, 3, 4 utawa 5. Selat akéh masarakat sing mékena nilé apik, berarti prokes wong dagang kuwé apik lan sawaliké,” jaréné.
Sementara kuwé, Bupati Tegal Umi Azizah ngungkapna, kabéh wong dagang diarep-arep gagiyan nerapna aplikasi MUTAN kiyé. Nggo mbiasakna. Kaya mbayar karo nggunakna aplikasi non tunai kiye. Ébén wong sing pada dagang aman wayah transaksi.
Bupati nambahi, aplikasi MUTAN kiyé dadi upaya nyegah nyebaré COVID-19. Soalé, wong dagang lan sing tuku, ora nggunakna duwit langsung sing rentan nyebar COVID-19. “Mengkoné wong dagang pan diméin reward utawa hadiah nggo sing bener-bener taat nerapna protokol kesehatan seka hasil monitoring waktu sawulan,” jaréné.
Umi njaluk karo masarakat, khususé bakul-bakul lan sing tuku, melu aktif nyegah nyebaré COVID-19. Disipliné masarakat kekait penerapan protokol kesehatan bisa kedeleng nang aplkasi MUTAN. Mugané keamanan aktifitas PKL bisa kejamin. “Tolok ukur keberhasilan program kiyé, yakuwé wong dagang kaki Iima éling nerapna protokol kesehatan,” jaréné. (*)
Disunting Daning: Muhammad Abduh
Discussion about this post