TEGAL — Pageblug corona ora nglerebna pengrajin sarung alat tenun bukan mesin (ATBM) nang Kota Tegal. Malah saiki bisa saingan karo negara liya nang pasar internasional. Kebukti, produk sarung seka Kota Tegal, sing rupané Songket Turkey, laris manis nang 8 negara nang Afrika. Ngalahna sarung sutra gawéan India karo Thailand.
Sing duwé PT Asaputex Jaya, Kota Tegal, Jamaludin Al Katiri, ngaku sukur soalé lawasé pandemi, yakuwé molai wulan Maret ngantikan wulan Agustus, laka penggurangan karyawan sijiya lan jumlahé ésih sekitar 6 éwu wong.
“Dhéwék arané pejuang tékstil sing ana nang pantura. Lawasé pandemi dhéwék nacak, berjuang kepibén mertahankna usahané dhéwék, utamané sing nyangkut karyawan akéh,” jaréné, dina Senen (30/11) .
Nang kondisi kaya kiyé, dhéwéké ya ngejak pengrajin-pengrajin ATBM sing ana nang wilayah éks Karésidénan Pekalongan (Brebes, Kota Tegal, Kabupatén Tegal, Pemalang, Kabupatén Pekalongan, Kota Pekalongan lan Batang) nggo nacak nginovasi nggawé motif motif anyar sing bisa ditampa nang pasar mancanegara utawané dalam negri.
“Pengrajin nang kéné kan ésih kefokus nang ATBM sing biasa diarani Sarung Tegalan. Latané dhéwék cacak nggawé sarung karo motif sing biasa digawé daning kota utawa negara liya. Lan alhamdulillah jebulé berhasil,” ungkapé.
Seka inovasi pertama, pengrajin-pengrajin ATBM sing kegabung jeronéng pembinaan PT Asaputex Jaya, Kota Tegal kiyé akhiré bisa ngetokna limang motif seka sarung Songket Turkey. Ora tanggung tanggung, inovasi sarung kuwé langsung ditampa nang 8 negara Afrika, 2 negara Timur Tengah lan 2 Negara Asia nang luar Indonesia.
“Kiyé yakuwé produk lan motif inovasi terapik. Bahan sing dhéwék nganggo saiki yakuwé bahan organik, seka bahan serat kayu. Regané lumayan murah, yakuwé nggo écéran paling dhuwur Rp 200 éwu,” jaréné.
Sarung kuwé, Jamal nglanjutna, dadi sarung alternatif nggo masarakat sing nglempuruk merga pageblug corona. Soalé, masarakat sing biasa nggunakna sarung nganggo bahan sutera sing regané ngantikan Rp 1,5 juta, bisa milih sarung Songket Turkey gawéan warga Tegal karo rega sing kejangko.
“Dadi, nyong ngileng lawasé pageblug kiyé, wong kepéngin nggunakna sarung sing duwé kwalitas apik lan rega kejangko. Mugané dhéwék etokna Songket Turkey karo rega écéran paling larang 200 éwu karo packing sing apik nemen,” jelasé.
Kekait karo inovasi sing dihasilna, Jamal ya krasa bungah karo perjuangan pengrajin-pengrajin ATBM nang kawasan Pantura Karésidénan Pekalongan sing mampu bertahan nang wayah pageblug corona. Apamaning, motif motif sarung sing dihasilnané lumayan apik lan yakuwé sarung fashion. Soalé sarung kiyé bisa digawé nggo klambi koko utawané dress nggo wadon.
“Alhamdulillah kiyé keberhasilan sing kudu disyukuri. Apamaning saiki dhéwék olih pesenan nggo wulan kiyé ngantikan wulan April taun ngarep. Malah, nggo wulan Oktober lan November wis ana penerimaan, ana cash balik seka luar negri. Kaya kuwé uga seka dalam negri, uga wis ana sing wekas. Utamané nggo Aceh, Makasar lan Banjarmasin,” pungkasé. (*)
Disunting Daning: Irsyam Faiz
Discussion about this post