TEGAL — Sawisé kena banjir pas lagi dina Rebo (13/1/2021) wingi, saiki warga Désa Wotgalih, Kecamatan Jatinegara, Kabupatén Tegal bareng karo pirang rélawan pada kerigan mbangun tanggul Kali Logeni, dina Jemuah (15/1/2021). Diarep-arep, tanggul kuwé bisa nahan mluntrahé banyu Kali Logeni wayah udan gedhé.
Salah siji rélawan, Sibat Jatinegara, Rochid ngomong, saben udan gedhé, banyu Kali Logeni mesti mluntrah lan manjing maring umah-umah. Mugané umah-umah nang désa kuwé wis dadi langganan banjir.
“Iya, udan gedhé sedelat baé mesti banjir, soalé wayah banyu kali mluntrah mesti manjing maring umah-umah. Mugané dhéwék bareng karo warga pada gotong-royong nggawé tanggul,” jaréné.
Gawé tanggul sementara kiyé, Rochid nglanjutna, nggunakna waring karo diisi pasir lan pring dadi sing nggo nahan. Tanggul sing digawé sadawanéng rongpuluh méter lan dhuwuré rong méter kiyé diarep-arep bisa nahan banyu kali ébén ora manjing maring umah-umah warga wayah mluntrah.
Baca Juga
“Kiyé sementara nggunakna waring isénan pasir. Ya minimal wayah banyu kali mluntrah, ora langsung manjing maring umah-umah warga,” jaréné.
Jaréné, sawisé banjir kisat, warga uga pada gotong-royong mbresihna lumpur nang umah-umah utawané dalan désa. Soalé wayah banjir dina Rebo (13/1/2021) wingi ora mung banjir banyu, tapi uga ke-ewor lumpur.
“Kondisiné dalan désa sih wis resik tapi ésih teles,” jaréné.
Sementara kuwé, Kepala Désa Wotgalih, Warji ngomong, kegiatan gotong royong dibagi dadi telung tempat, yakuwé gawé tanggul, ngeruki lumpur nang dalan lan ngurug dalan sing bodhol.
“Seka rong dina wingi sawisé banjir pancén warga lan rélawan wis pada gotong-royong nggo nangani. Lan dina kiyé gawé tanggul Kali Logeni, tepaté nang RT 1 RW 5,” tuturé.
Saliyané kuwé, warga uga pada gotong-royong ngeruk lumpur sing nutup dalan. Kandelé lumpur semadan parah malah ora bisa diliwati mobil. Latané ngurug dalan sing pada bodhol.
“Banjir nang kéné wis langganan, soalé mluntrahé banyu Kali Logeni. Mugané dhéwék pada gotong-royong nggawé tanggul,” jelasé. (*)
Disunting Daning: Irsyam Faiz
Discussion about this post