BREBES – Tim Gugus Tugas Percepatan Penanggulangan COVID-19 Kabupaten Brebes mutusna Kegiatan Belajar Mengajar (KBM) adep-adepan utawa tatap muka nang Kabupaten Brebes diandegna, dina Rebo (15/7/2020). KBM nang pendidikan dasar, sing tembe rong dina dilaksanakna karo adep-adepan, dibalakna dadi Pembelajaran Jarak Jauh (PJJ) utawa nganggo cara daring/online. Putusan kuwe dijukut, nyusul perkembangan kasus positif COVID-19 munggah jero kurun waktu saminggu kiye.
Sadurunge, dilaksanaknane KBM adep-adepan mung dilaksanakna nang siji SMP negri, sing wis dituding Dinas Pendidikan Pemuda dan Olahraga (Dindikpora) dadi sekola ujicoba diterapnane protokol kesehatan. Sementara sekola liya mung sewates nglakoni kegiatan Masa Pengenalan Lingkungan Sekolah (MPLS) .
Sekretaris Gugus Tugas Percepatan Penanganan COVID-19 Kabupaten Brebes, Djoko Gunawan ngomong, nganti wayah kiye perkembangan kasus COVID-19 nang Brebes dinamis nemen. Nang dina Senen lagi minggu wingi, kasus positif sing luwih mung seakeh 3 wong. Tapi pirang-pirang dina pol-polan ana ketambahan jumlah pasien.
“Anjog dina kiye jumlaheng kasus positif wayah kiye 46 wong. Sing jumlah kiye 8 wong dirawat lan 2 wong dikarantina. Senen wingi ngengah 3 wong. Saliyane kuwe, uga ana Surat Edaran sing provinsi nggo kegiatan adep-adepan pendidikan diandegna. Dadi dhewek melu kuwe,” omonge Djoko Gunawan, dina Rebo (15/7/2020).
Dheweke njelasna, nggo proses pembelajaran tutugane pan dilakoni karo metode daring utawa online. “Sabenere persiapan sekola nggo adep-adepan sesuai protokol kesehatan. Angger dhewek deleng wis apik. Kaya nang SMP Negri 2 Brebes,” jelase.
Saliyane KBM adep-adepan, jare Djoko, kegiatan MPLS seka tingkatan PAUD, TK, SD anjog SMP uga diandegna. Nggo tingkatan SMA dhewek dadi kewenangan provinsi toli daning provinsi diandegna.
Jare dheweke, diandegnane KBM kuwe anjog wateseng waktu sing durung bisa ditentukna, soale kudu ndeleng perkembangan COVID-19 disit. “Angger ndeleng posisi indeks RT, kasus COVID-19 nang Brebes nang saminggu sing disit ana nang 0,29, mugane manjing zona ijo. Wayah kiye Brebes uga esih manjing zona ijo, tapine indek RT ana pergerakan nang posisi 0,8. Esih zona ijo soale indeke nang ngingsor 1,” ungkape.
Sementara kuwe, Kepala SMP Negri 2 Brebes, Murtado ngiyakna wayah kiye KBM adep-adepan wis diandegna.
Nggo dasar diandegnane kegiatan sinau adep-adepan kiye ndasari Surat Edaran (SE) nomer 420/O1663/2020 ngenani Penyelenggaraan Kegiatan Masa Pengenalan Lingkungan Sekolah dan Kegiatan Belajar Mengajar taun 2020/2021 Pada Satuan Pendidikan PAUD PNF, SD, SMP nang Kabupaten Brebes.
Ana point siji nang jero SE kuwe nyebutna, guna nggo nyegah uga upaya nyepeti kepedote rante nularan lan nyebare COVID-19, kebijakan Pembelajaran Jarak Jauh (PJJ) nggo kabeh jenjang pendidikan (PAUD PNF, SD, SMP) nang Kabupaten Brebes, didawani nganti ngenteni pemberitahuan luwih lanjut sing Kepala Dinas Pendidikan Pemuda dan Olahraga Kabupaten Brebes. Termasuk kegiatan Pembelajaran Tatap Muka (PTM) nang Smp Negri 2 Brebes dadi sekola ujicoba diandegna.
“Ya nganggo dasar SE kuwe, lekas dina Rebo kiye diilangna. Kabeh kegiatan nganggo sistem daring utawa online bae,” omonge Murtado. (*)
Discussion about this post