BREBES – M. Jupri, terdakwa kasus ngantemi batiré dhéwék sing padha-padha bakul emas kaki lima Rosyidin, akhiré dibébasna seka tuntutan pidana. Dhéwéké dibébasna metung penyelesaian perkara berdasarkan keadilan restoratif, Restorative Justice (RJ).
Penyerahan putusan RJ diserahna langsung daning Kepala Kejaksaan Negeri (Kejari) Brebes Yadi Rachmat Sunaryadi maring kedua belah pihak, neng hal kiyé pelaku lan korban nang aula Kejari, dina Senén (28/8/2023).
Terdakwa M. Jupri sadurungé dilaporna ngantem korban ping pindo karo payung, dina Rebo (24/05/23) wingi. Jupri akhiré kudu urusan karo hukum lan disangkakn Pasal 351 ayat (1) KUHP.
Pemberian Restorative Justice, uga disaksikna langsung daning Kepala Kejaksaan Negeri Brebes Yadi Rachmat Sunaryadi, Kasi Pidum Kejari Brebes Nugroho Tanjung, tokoh masarakat lan tokoh agama, nganti kluwargané pelaku lan korban.
Kajari Brebes Yadi Rachmat Sunaryadi ngomong, pemberian Restorative Justice soalé wis menuhi persyaratan sing berdasarkan Perja (Peraturan Kejaksaan) Nomor 15 Tahun 2020 tentang Penghentian Penuntutan Berdasarkan Keadilan Restoratif.
“Nggo pertimbangané, terdakwa durung pernah nglakoni tindak pidana sadurungé. Keloro, anceman pidanané maring terdakwa kurang seka limang taun penjara,” jaré Rachmat Sunaryadi didampingi Kasi Pidum Kejari Brebes Nugroho Tanjung, lubar pemberian Restorative Justice.
Saliyané kuwé, pemberian Restorative Justice dilakokna, soalé terdakwa sadurungé wis mékena duwit kompensasi nggo pengobatan segedhé Rp 10 juta. Termasuk wis ana kesepakatan perdamaian antara korban lan terdakwa.
“Kekarepané, anané kejadian kiyé bisa dadi pengalaman antara terdakwa lan korbané, bisa padha-padha njukut hikmah lan pelajaran,” ungkapé.
Kajari pesen maring M. Jupri ébén lewih sabar lan ora tumindak nuruti emosi. Luwih-luwih, korban ora ngalami tuna secara fisik utawa materiil soalé wis dilakokna musyawarah karo tokoh masarakat lan kluwargané dhéwék-dhéwék. (*)
Discussion about this post