SLAWI – Pandemi Corona utawa COVID-19 duweni dampak sing lumayan gedhe maring bakul kewan kurban wayah enggal Bada Aji utawa Hari Raya Idul Adha 1441 H / 2020 taun kiye. Dodolan kewan kurban taun kiye dipredisikna temurun dibandingna karo taun sing ndisit.
Kiye katon seka dodolan wayah enggal Badaji utawa Idul Adha sing nggari pirang mingguan maning. Dodolan dirasakna peternak lumayan lesu. Kondisi ekonomi masarakat sing durung mari uga dadi pemicune.
Wong sing dadi juragan Kambing Center Tegal Abdul Basir ngomong, taun disit, ana pirang sekola nganakna kegiatan kurban. Tapi taun kiye durung ana sijiya sekola sing pesen kewan kurban. Apa maning nang wayah pandemi, sekola esih dipreikna.
“Biasane sa sekola bisa wekas 5 — 7 buntut wedhus,” ungkape Kemis (9/7/2020).
Dudu mung seka sekola tok sing temurun pesenan kewan kurbane, seka pihak perusahaan ya padha. Biasane pelanggan perusahaan wis pesen kewan kurban. Saiki durung ana.
“Taun kiye nyong bener-bener ngrasakna mudune omzet sing lumayan. Belih mung kuwe, nggo kewan sing asale seka zona abang utawa wilayah Jawa Timur, sementara ora nyong tekakna. Nggo njaga kemungkinane kena saking sing ngater kewan,” jarene.
Hal sing padha diungkapna juragan ternak kewan sapi seka Margasari, Hernawa. Dheweke ngomong, biasane wulan Sawal tanggal 10 wis bisa nglayani 20 buntut sapi.
“Angger saiki sepi. Paling mung 3-4 buntut sapi tok. Pelangan-pelangan dingin sing seneng tuku kewan sapi maring dhewek, nyong cacak nawani. Tapi, jawabane nggo taun kiye ora tuku dingin,” omonge.
“Usahane nyong ngalami tuna gedhe nang wayah pandemi,” tambahe.
Hernawa ngomong, uga ana juragan-juragan sing gemiyene bisa wekas sapi premium (sapi gedhe), tapi merga corona kiye dheweke pada ora bisa tuku sing premium. Tapi mung bisa tuku jeniseng sapi sing biasa utawa ukurane luwih cilik.
“Karo kondisi sing saiki dhewek njalani bae. Mugane, nang taun kiye nyong lekas pindah garapan. Tani bawang. Syukur-syukur wayah enggal utawa detik-detik terakhir wayah enggal Hari Raya Idul Adha 1441 H lekas akeh sing tuku utawa pesen kewan kurban.” (*)
Disunting Daning: Irsyam Faiz
Discussion about this post