PEKALONGAN — Vidio emak-emak pada ngguwang runtah semblotongan viral lan nyebar neng média sosial. Neng vidio kuwé, katon emak-emak kaya ora nduwéni dosa ngguwang seplastik runtah nang tumpukan runtah nganti numpuk nang gili gedhé Banyurip, Kota Pekalongan.
Vidio sing durasiné méh rong menit kiyé diunggah daning akun Instagram @pekalonganinfo pas dina Slasa (10/05/2022) lan wis dibagikna nétizen luwih seka 130 éwu. Neng unggahan vidio kuwé ketulis “Dilaruhi karo Masarakat ébén ora ngguwang runtah semblotongan apamaning nang pinggir dalan, melas kan ngarep umahé wong didadékna tempat pembuangan runtah. Lokasi nang Gili Gedhé Banyurip Sewelah Gang 4”.
Seka penulusuran, lokasi sing didadékna dadi Tempat Pembuangan Sementara (TPS) runtah kiyé pas ana nang ngarep Gang 4, Banyurip, Pekalongan Selatan. Nang lokasi kuwé wis dipasang MMT, sing menging warga ngguwang runtah semblotongan.
Salah siji warga, Muhamad (35) warga Buaran ngomong, akéh warga sering ngguwang runtah semblotongan, tepaté nang ngarep warung és dawegan.
“Wayah esuk biasané emak-emak guwang runtah nang kono. Nyong uga sering ngileng lan bolan-balén ngélingna. Tapi ya tetep baé kaya kuwé. Nyong uga keganggu mambuné soalé warungé nyong uga perek nemen karo lokasi runtah,” jaréné.
Dhéwéké negasna, ana pirang emak-emak sing biasa ngguwang runtah rata-rata dudu warga kono. Tapi dhéwéké sakepenaké ngguwang runtah senajan akéh warga sing ngonangi dhéwéké.
“Bandel sih. Belih ngarti keningapa, apa belih duwé prasaan, guwang runtah nang ngarep dodolan inungan és degan persis, perek warung mangan,” ungkapé.
Kondisi runtah sing numpuk nang pinggir dalan kuwé katon sajegé dina Senén (09/05/2022), yakuwé pas trek runtah ora ngangkut.
“Ya biasané ana trek sing ngangkuti runtah kuwé. Tapi sajegé sawal kiyé laka. Sabeneré masalahé dudu kuwé, tapi tempat kuwé didadékna tempat guwang runtah. Kiyé dalan, dudu tempat pembuangan runtah uga,” omongé.
Sementara kuwé, Camat Pekalongan Selatan, Rusmani Budiharjo ngomong, pihaké wis sokan nglaruhi ébén ora ngguwang runtah nang kono. Nggo dina kiyé runtah wis resik lan petugas pan mantow terus aksi pembuahan runtah kuwé.
“Kasi Trantib Kelurahan banyurip wis mantow lan mékena édukasi maring warga sing ngguwang runtah nang lokasi kuwé, ébén ora mbaléni maning,” omongé.
Walikota Pekalongan, Achmad Afzan Arslan Djunaid, nyebut viralé vidio kuwé sabeneré nggo pembelajaran lan pangéling nggo warga sing bandel ngguwang runtah sembarang.
“Nyong setuju, viralna baé vidio kuwé, péndah dhéwéké kapok. Nyong sokan nyampékna masalah runtah nang kota Pekalongan, segedhé apabaé anggaran nggo nangani runtah, seapik apabaé program kuwé, angger laka dukungan seka masarakat, padha baé goroh, dhéwék ora pan maksimal,” jelasé. (*)
Discussion about this post