TEGAL — Bencana lemah longsor kedadén nang Désa Padasari, Kecamatan Jatinegara, Kabupatén Tegal lubar udan gemerot sing kedadén dina Saptu (15/1/2022) soré. Senajan laka korban jiwa, tapi nggawe welasan umah warga ruwag.
Lurah Désa Padasari, Kecamatan Jatinegara, Mashuri wayah dikonfirmasi, dina Minggu (16/1/2022) ngomong, umah warga sing ruwag gara-gara longsor seakéh sewelas umah, siji neng antarané ruwagé parah lan liyané sedeng.
“Gara-gara udan gemerot, lahan perbukitan nang désa kuwé oyag lan longsor, akibaté nggawé ruwag umah warga,” jaréné.
Bencana kuwé kedadén nang Dukuh Padareka RT 05 RW 01 lan Dukuh Tigasari RT 15 RW 03. Ana umah siji sing ruwagé lumayan parah. Umah kuwé ndéké Solihin karo tuna luwih seka rongpuluh juta. Lokasiné nang Dukuh Padareka.
“Nggo umah sing ruwagé parah yakuwé ndéké Pak Solihin. Soalé umahé ora bisa dipanggoni, dadi kepaksa pak Solihin ngungsi,” jaréné.
Sementara, jaré Mashuri, bencana lemah longsor sing kedadén nang Dukuh Tigasari, wis nggawé ruwag sacuilé sewelas umah. Ruwagé neng antarané ubin umahé mletak lan bangunané rawan ruwag.
Saliyané nggawé umah ruwag, bencana alam lemah longsor uga nggawé dalan sing nuju maring Dukuh Padareka mblesek. Dawané dalan sing mblesek kuwé diperkirakna sekitar telungpuluh méter lan amba telung méter. Padahal, dalan kuwé mbéké didandani.
“Pancén posisiné Désa Padasari ana nang aréa perbukitan. Mugané rentan karo bencana lemah longsor lan oyag,” ungkapé.
Sementara kuwé, Solihin nyritakna, wayah kedadénan kedadén dhéwéké lagi ana nang musala. Sedengé bojoné, anak lan putuné nang umah. Untung, bojoné bisa slamet.
“Ya begitu kedadénan, bojo, anak lan putuné nyong langsung mlayu metu seka umah nggo nylametna awaké dhéwék-dhéwék. Longsor nggawé pondasi umahé nyong ruwag,” tuturé.
Sementara kuwé, Ketua Palang Merah Indonesia (PMI) Kabupatén Tegal Iman Sisworo metung Kepala Markas PMI Sunarto ngomong, pihaké wis nguduna petugas Sibat Jatinegara nggo nglakoni asesment.
“Personilé dhéwék wis mudun maring lokasi nggo nglakoni assesment. Rencana, dhéwék pan mékena bantuan nggo para korban,” jelasé. (*)
Discussion about this post