BREBES – Nang Désa Tegalglagah, Kecamatan Bulakamba, Kabupatén Brebes, ana wong loro benjut diamuki wong-wong, dina Senen, 17 Agustus 2020. Jebulané wong loro kuwé bar konangan daning warga lagi nyolong motor.
Informasi sing ditampa PanturaPost.com nyebutna, ke loro pelaku yakuwé spesialis tukang nyolong motor lan bekas metu seka penajara. Pelaku sing masing-masing arané, Jasriyanto (52) lan Suchemi (44), kuwé dingerteni warga Kabupatén Pemalang.
Sadurungé aksiné konangan daning warga, potongané wong loro kuwé katon nyurigakna. Pelaku kuwé mlaku muter-muter nang sekitar parkiran sing ana nang désa kononé nggo ngincer sa unit motor. Sawisé kepergok nggondhol sa unit motor Honda Béat, ke loro pelaku ya latané dicekel lan nggo jambalan daning puluhan warga.
Malah, pelaku sempet diarak ramé-ramé maring balé désa Tegalglagah. Untung baé, ora let suwé tim unit Réskrim Polsék Bulakamba teka nggo ngamanna ke loro pelaku sing diantemi wong-wong.
“Nganti saiki dhéwék ésih nglakoni pengembangan kasus nyolong motor kiyé. Apa, ana TKP liyané dhéwék ésih lakoni pendalaman,” omongé Kanit Réskrim Polsék Bulakamba, Ipda Tasudin.
Nggo sementara, dhéwéke ngomong, pihaké ngamanna rong pelaku nang penjara Mapolsek Bulakamba. Merga kasus kiyé, ke loro pelaku diancem karo kurungan penjara lawasé pitung (7) taun.
Wayah diinterograsi, pelaku Jasriyanto ngaku kepaksa nglakoni aksiné kuwé merga kepépéd kebutuhan ékonomi. Soalé wis ahli, dhéwéké mung mbutuhna wektu ora nganti telung (3) menit nggo nggondhol motor siji.
Lah, nggo barang bukti sing diamanna petugas, nang antarané yakuwé sa unit motor honda vario dadi sarana pelaku lan sa unit motor honda béat ndéké korban. Saliyané kuwé, polisi uga ngamanna kunci Letter T siji. (*)
Disunting: Irsyam Faiz
Discussion about this post