TEGAL — Pintu air nang Désa Dukuhlo, Kecamatan Lebaksiu, Kabupatén Tegal ambles gara-gara kaliné banjir gedhé nemen pas lagi dina Ahad (9/1/2022). Kondisi kuwé nggawé dalan Dukuhlo-Babakan tugel lan duwé poténsi mblébér maring perumahan warga. Angger ora gagiyan didandani, warga ya kuwatir pan mblébér maring pemukiman.
Tiswo (44) warga RT 1 RW 2 Désa Dukuhlo, wayah ditemoni, dina Senén (10/1/2022) ngomong, kedadénan awal ambles yakuwé neng wulan Novémber 2021. Tapi, kondisiné selot parah wayah kedaden banjir lagi dina Ahad (9/1/2022) soré.
“Pas kuwé kedadén banjir, malah banyu nganti manjing maring pemukiman. Dhuwuré banyu sekitar 20 céntiméter,” jaréné.
Tiswo ya ngaku kuwatir wayah udan barat kedadén maning. Pasalé, pintu air ambles lan nggawé banyu mluntrah. Banyu seka pintu air ya dipastikna pan manjing maring pemukiman lan nggawé umah warga keleban banjir. Saliyané pintu air ambles, brug désa uga tugel.
“Dhéwék kepaksa luruh dalan liyané nggo aktifitas, soalé brug tugel,” ungkapé.
Wayah ngileng nang lapangan, pintu air sing misahna banyu irigasi maring pirang lahan pertanian nang wilayah kuwé, ambles gara-gara udan barat sing kedadén nang wilayah Kabupatén Tegal, dina Ahad soré (9/1/2021).
Akibaté, banyu mluntrah lan ngecémbongi ana pirang umah nang sekitar pintu air kuwé. Sementara kuwé, brug nang pintu air Dukuhlo tugel gara-gara dihampad banyu kali kuwé. Malah, separo dalan gripis ngantikan nugel dalan kuwé.
Bencana kuwé olih perhatian seka Komisi III DPRD Kabupatén Tegal sing ngileng langsung pintu air kuwé, dina Senén (10/1). Kunjungan dipimpin daning ketua Komisi III Munif lan wakilé M Khuzaeni.
Sementara kuwé, ana kunjungan uga seka Balai Besar PSDA Pemali-Comal, Bidang SDA DPU Kabupatén Tegal lan Badan Penanggulangan Bencana Daérah (BPBD) Kabupatén Tegal.
“Nyong rasa kiyé kudu gagiyan ditangani, apamaning brug sing dadi akses dalan warga Dukuhlo kepedot. Ora mung akses ékonomi lan pendidikan, tapi uga dalan nggo pemakaman,” jaré Ketua Komisi III DPRD Kabupatén Tegal Munif.
Saiki, jaré Munif, sing ndesak dilakoni yakuwé dandanan pintu air lan normalisasi kali. Pasalé, kondisi sa pintu air lan sedimentasi dhuwur nemen, mugané banyu mluntrah maring perumahan warga.
“Nggo kali kiyé kewenangané yakuwé PSDA. Dhéwék nyurung nggo dandanan sacepeté,” tegasé.
Kasi Pengendalian dan Pendayagunaan Balai PSDA Pemali-Comal, Anung H Anindityo ngakoni ari dandanan dadi kewenangané. Tapi, anggaran asalé seka APBN nggo alokasi pemeliharaan.
Nggo pintu air Dukuhlo utawa sing diarani Bangunan Wadas 4 DAS Gung, wis dianggarna sajroné APBN taun 2022 segedhé Rp 90 juta. Dandanan pintu air kuwé direncanakna molai pertengahan wulan Fébruari 2022.
“Nggo dandanan wis dianggarna lan gagiyan molai pertengahan wulan Fébruari,” omongé. (*)
Disunting: Irsyam Faiz
Discussion about this post